– Дюнья оьлчевюндеги ярышларда сен биринчилей ортакъчылыкъ этемисен?

 

– Уллуланы арасында биринчилей ябушдум.

 

– Нече керен ябушдунг?

 

– 67 кило авурлукъда дёрт керен рингге чыкъдым. Уьч ёлугъувну утдум. Финалдагъы ёлугъувну да утгъан эдим, тек утувну башгъагъа берип къойду.

 

– Олай нечик бола?

 

– Мени булан ябушма чыкъгъан спортчугъа уьч де раундда гьужум этип турдум. Ёлугъув айтардай къыйын да болмады. Сынав яндан мен ондан гючлю эдим. Тек ёлугъув битгенде, судья ону къолун гётерип къойду. Мени тренерим Алибий Къазиев судья коллегиягъа ябушувну гьасиллерине янгыдан къарамагъа таклиф этди. Шондан сонг бир судья басгъан кнопка ишлемей къалгъаны ачыкъ болду. Айтагъаным, ол магъа очко бере, тек очко компьютерге бармай. Бираз эришивлер де болду, тек судьялар оьзлени къарарын алышдырмадылар. Шолайлыкъда, магъа гюмюш медаль тапшурулду. Не этме герек, спортда кёп тюзсюзлюклер ёлугъа.

 

– Алимпаша, гележекде къайсы ярышларда ортакъчылыкъ этежексен?

 

– Ювукъ арада Дагъыстанны чемпионатында, Грозныйда оьтгерилежек Россияны кубогу учунгъу ярышларда ортакъчылыкъ этмеге хыялым бар.

 

– Гёз алгъа тутгъан ярышларда уьст гелме насип ёрайман.

 

– Савболугъуз.

 

 

И. ГЬАЖИЕВ.

Автор чыгъаргъан сурат.