Адатлангъан кюйде, Россияда Юрт хозяйство къуллукъчуну ва ишлетив промышленностуну гюню байрам оьлчевюнде гьар йыл октябр айны экинчи къаттыгюнюнде оьтгериле.

Шо гюн арадан оьтген вакътини ичинде къолда этилинген уьстюнлюклер, йиберилген кемчиликлер уьлкебизни оьзге регионларында йимик Дагъыстанда да гёзден гечириле. Гележекге байлавлу янгы борчлар белгилене ва шоланы яшавгъа чыгъарывну ёллары токъташдырыла.

Дагъыстан да аграр республика гьисапда ич ва тыш къоллавчуланы сурсат аманлыгъын болдурмакъ муратда агьамиятлы масъаланы яшавгъа чыгъармакъ учун оьз къошумун болдура. Айтмагъа сюегенибиз, бизин булан дос тюгюл пачалыкълар билдирген санкциялагъа бойсынмай, ашамлыкъ малланы къадарын ва сан янын къолайлашдырмакъ муратда гьаракатын артдыра.

«Юрт хозяйствону асувлугъу учун» деген белгили пачалыкъ программаны оьлчевюнде токъташдырылгъан борчланы яшавгъа чыгъармакъ учун юрюлеген гьаракат да генглеше барагъаны гьакъда айрыча эсгермеге тюше.

Республикабызны экономикасын белгилейген аслу тармакъларда: юзюмчюлюк­де, бавчулукъда, чалтик, овощлар оьсдюрювде йимик гьайванчылыкъ ва къушчулукъда да натижалар къолайлашагъаны ачыкъ болуп гёрюне. Етишилген уьстюнлюклер булан дазуланмайлы, бу йыл да бизин республикабызны агропромышленный комплексини къуллукъчулары 220 минг тон юзюм, 120 минг тон чалтик, 1 миллион тон овощлар ва шолай да 500 минг тонгъа ювукъ емишлер оьсдюрмеге токъташгъан эди.

Озокъда, йылны ахырынчы натижаларын аянлашдырмагъа гьали де тез. Тек ишлени барышына гёре белгиленген борчлар яшавгъа чыгъарылажагъы шекликни тувдурмай.

Шону учун оьз ишинде ла­йыкълы уьстюнлюклеге етишген юрт хозяйство тармакъны коллективлери ва айрыча иш гёреген тайпалар материал ва ругь якъдан иштагьландырыла.

Артдагъы йылларда мердешленгени йимик, бизин республикабызны агропромышленный ком­п­лексини алдынлы предприятиелерини коллективлери ва айрыча иш гёреген гьаракатчы тайпалар, сабанчы-фермер агьлюлер уьлкебизни тахшагьары Москвада оьтгерилеген «Алтын гюз» деген сурсат фестивальда ва регионларда болагъан ярмакюлерде ортакъчылыкъ эте.

– ВДНХ-да фестиваль октябр айны 9-у болгъунча юрюлежек, – деп билдире Москвадан ДР-ни юрт хозяйство ва сурсат минист­рини заместители Эмин Шайхгьасанов. – Шонда аслу гьалда бизин уьлкебизни гьар тюрлю регионларындан гелген ва ортакъчылыкъ этеген 300-ден де кёп сабанчы-фермер агьлюлер оьз продукциясын гёрсете. Авлакъ ниъматлардан, юзюмден ва емишлерден башгъа эт малланы, акъкъатыкъланы, емишлерден ва овощлардан гьазирленген татли сувланы алывчулагъа малим эте.

Къызылюрт ва Гьайдакъ районланы вакиллери Моск­вада, Санкт-Пе­тербургда оьтгерилеген яр­макю-выс­тав­каларда алдынлы ерлени къазанагъаны гьакъда да айрыча эсгерме тюше.