Шейит-Ханум Алишева,
Дагъыстанны халкъ шаири
Мен тюгюлмен
Къабунуп язгъан кагъызынг
Чалт охуйман бугюн мен.
Гертилейим сёзлерингни,
Мен гьали – мен тюгюлмен.
Мен тюгюлмен эл енгмейген,
Чарчымлы шо бир къызъяш.
Юрегингни урлап къачгъан,
Гелип биринчи язбаш.
Мен тюгюлмен, яланаякъ
Тав башланы гезейген.
Савгъат этме сююп сагъа,
Кёкден юлдуз излейген.
Ол гиччиди, мен уллуман–
Кёп йыллардан оьтгенмен.
Сен тартагъан чачларымны
Болмагъандай этгенмен.
Сен юртгъа къайт, сонг гёрерсен,
Алмашынгъанман башгъа.
Къаст этгенмен ошамасгъа –
Сени сюйген къызъяшгъа.
Патимат Абукова
Халкъым
Халкъым насипли буса,
Мени гёнгюм ярыкъдыр.
Халкъсыз гёрген насибим
Магъа негер тарыкъдыр.
Савумда мурадыма
Етдирежек де халкъым.
Оьлгенде сынажамны
Гётережек де халкъым.
Тарыкъ гюнде табулуп,
Гьазир кёмек этежек.
Халкъым булан батгъычсыз
Тёбем кёкге етежек.
Халкъым насипли буса,
Мени гёнгюм ярыкъдыр.
Халкъсыз гёрген насибим
Магъа негер тарыкъдыр?
Узлипат Ибрагьимова
Сююв толгъан йырларым
Гёк гюмезлер къызарышып гетеген
Танг шавлада тува мени йырларым.
Юреклени пашманлыкъгъа элтеген
Къарангыны къува мени йырларым.
Айланагъа арив ийис чачагъан
Бюрлер нечик тува буса терекде,
Гюнге багъып къулачларын ачагъан
Йырларым да шолай тува юрекде.
Къумукъ халкъым, сенсен мени терегим.
Мен билемен, гюллер болмай терексиз,
Къумукъ халкъым, сенсен мени юрегим,
Сююв толу йырлар болмай юрексиз.
Сюер эдим сююв толгъан йырларым
Сююп халкъым ювугъуна алгъанны.
Сюер эдим сююв толгъан сырларым
Халкъ авзуна йырлар болуп къалгъанны.
Рукъуят Устарханова
Дагъы гетме…
Биринчилей мени тавлар къаршылай,
Инбашына инбаш тиреп чирелген.
«Хошгелди», – деп оьзен чаба артымдан,
Гиччи яшдай этегиме иерген.
Мен кюлеймен, ер такрарлай кюлкюмню,
Агъачлыкъгъа гетди сююнч айтмагъа.
Оьз-оьзюмден гечип болмай тураман,
Болмагъангъа йыл битмейли къайтмагъа..
Сувукъ-салкъын эринлерин оьбемен,
Хатиржанлы гёрюп «Гьасан булакъны».
Балгьам йимик авазлары яшланы –
Савгъат йимик ойнакълаву улакъны.
«Дагъы гетме», – деп, артымдан созулуп,
Жыгъаналар опурагъыма илине.
Ватанымны гюч береген тамуру
Басгъан-басгъан абатымда билине.
Супиянат Мамаева
Терегим
Мен биледим оьсмейгенни бу терек
Бу ерлерде, бу эллерде, тарлыкъда…
Ойлашып да болгъан хари табиат,
Гьатта терек чыныгъа деп харлыкъда.
Сюйсе болсун еллер,
Сюйсе боранлар,
Сюйсе явсун бузлу къарлар бир тынмай,
Тамурунда йыр агъагъан терегим
Ярты ёлда танг къатардан тартынмай.
Къызыл тангым къарай магъа къызарып,
Кёкрегинде йырлай эркин минг терек.
Йырларына бир гюн тынып тынглажакъ.
Савлай алам, болуп гиччи бир юрек.
Зулейха Атагишиева
Танг яхшы болсун, дюнья!
Танг яхшы болсун, дюнья!
Яхшылыкъ тувдурардай.
Явагъан алмаз чыкълар,
Берекет явдурардай.
Танг яхшы болсун, дюнья,
Тенгирим язгъан кюйде,
Насип чырагъын якъсын,
Гьар ожакъда, гьар уьйде.
Танг яхшы болсун, дюнья,
Елге гетсин талчыгъынг.
Адамурлукъ гёрердей
Арив кёкню ачыгъын.
Алмаз чыкъгъа къошулуп
Къырда исси ел эше.
Танг булан тургъанлагъа
Аллагь насип уьлеше.
Танг яхшы болсун, дюнья,
Беженлер бек толардай.
Гьар алгъан абатыбыз
Яхшылыкъгъа болардай.
Гёгюрчюн Атаева
Тюшюмде
Бирев къагъып тереземни:
«Уян,уян,уян, –дей.
– Сююв бир де сёнмес деп,
Алдангъанынг таман, – дей.
– Насибингни язбашлары
Кёп сююнчлер берди, – дей.–
Сав йыл бою яз боламы,
Энни къыш да гелди, – дей.
– Сюювюнгню, сююнчюнгню
Алатолпан алгъан, – дей.
– Умутларынг чечеклердей
Дёнюп-сёнюп къалгъан, – дей.
Сюйгенинг де сени гёзлеп,
Орам башда къарамай.
Сююв бир де сёнмежек деп,
Инанмагъа ярамай».
Уянаман… Къоркъунаман,
Сюйгениме чабаман.
Тюшюмдеги сувукълукъну
Гёзлеринде табаман…
Сююв бир де сёнмежек деп
Алданмагъа ярамай…
Гюлбагъдат Омарова
Сари япыракъ
«Ташлап къойдунг сен мени»,– деп
Йылай сари япыракъ.
Сари япыракъдан толгъан,
Мангыраша дёрт де якъ.
Япыракълар бавру гююп
Терегине яс эте.
Гюзгю терек сююп гийген
Опурагъын тас эте.
Къайдан гелди! Чырмап боран,
Алып гетди сюювюн.
Башын чайкъай. Агь чегедир,
Гёр терекни гюювюн!
Ел уьфюре. Бу къувунгъа!
Ошап юрюй чавушгъа.
Титирейсен, титирейсен
Бу элдеги тавушгъа…
«Ташлап къойдунг сен мени», – деп
Бозлай сари япыракъ.
Сари япыракъдай сёндюм,
Къара чачым къардай акъ.
Тереклер чи язбаш булан
Гиер янгы опуракъ.
Учуп гетген сюювюмдей,
Учду сари япыракъ.
