Артдагъы гюнлерде Анапа шагьарда спортну бокс журасы булан машгъул болагъан спортчуланы биринчи Бютюнроссия форуму оьтгерилген. Эсгерилген шо форумну барышында бизин уьлкени оьлчевюнде иш гёреген спортну бокс журасына къарайгъан федерациясыны 2018-нчи йылдагъы гьаракатыны гьасиллери арагъа салынып ойлашылгъан ва гележекде яшавгъа чыкъмагъа тюшеген борчлар белгиленген.
Шону булан бирге, оьтген йылда юрюлген ярышларда гёрмекли оьрлюклеге етишмеге болгъан инг бажарывлу боксёрлагъа акъча савгъатлар тапшурулгъан. Оьтген йылны гьасиллерине гёре оьрлюклеге етишген спортчулар, оланы тарбияламагъа бажаргъан тренерлер, олай да юрюлеген ярышланы оьтгеривде жагьчылыкъ гёрсетген судьялар ва оьзге касбучулар акъча савгъатлар берилип иштагьландырылгъан.
Оьтгерилген шо форумда Россияны инг бажарывлу беш боксёру деген гьисапда белгиленгенлени арасында Россияны ат къазангъан тренери Рашитбек Агьматовну алдында тарбияланагъан къумукъ улан, белгили жамият чалышывчу, юрист, педагог Тажутдин Бижамовну уланыны уланы Жанболат Бижамов да бар.
Жанболат Бижамовну оьмюр чагъы 20 йылгъа етмеген буса да, ол уьлкени жыйым командасына къуршалып, дюньяда биринчиликни алмакъ учун Венгрияда юрюлген ярышларда оьзю булан тогъатартмагъа чыкъгъан спортчуланы барысын да утуп, алдынлыкъны алмагъа болгъан. Шону да уьстевюне, эсгерилген ярышланы гьасиллерине гёре, ону аты инг де пагьмулу спортчу гьисапда айтылгъан. Бизин уьлкени инг бажарывлу боксёрлары токъташдырылагъанда, яш спортчу етишген шо уьстюнлюгю гьисапгъа алынгъан. Россияны боксгъа къарайгъан спорт федерациясыны баш секретары Умар Кремлев огъар 750 минг манатны оьлчевюнде сертификат тапшургъан.
Бизин республиканы физкультурагъа ва спортгъа къарайгъан министрини заместители, Олимпия оюнланы чемпиону Гьайдарбек Гьайдарбеков да маълумат къуралланы вакиллери булангъы ёлугъувуну вакътисинде Ж. Бижамовну гьаракатына оьр къыймат берген. Ол билдиргени йимик, Жанболат гележекде дагъы да уллу уьстюнлюклеге етишмеге, Олимпия оюнларда ортакъчылыкъ этежек бизин уьлкени жыйым командасына да къуршалмагъа имканлы спортчу гьисаплана.
Газетни бары да охувчуларыны ва къуллукъчуларыны атындан Жанболат Бижамовну етишген оьрлюклери ва берилген савгьат булан гьакъ юрекден къутлап, огъар оьзю танглагъан бокс йимик бек къыйын спортну журасында уьстюнлюклер ёрайбыз. Касбучулар айтагъан кюйде, ол гележекде оьр даражада оьтгерилеген ярышларда ортакъчылыкъ этип, оьзюню атын данггъа чыгъаражагъына биз де инанабыз.
Ювукъ вакътини ичинде ону булан ёлугъуп, газетни охувчуларыны тергевюне бермек учун лакъырлашыв оьтгерилмеге де гёз алгъа тутула.
Н. БАЙБОЛАТОВ.
СУРАТДА: Ж. БИЖАМОВ оьзюню тренери Р. АГЬМАТОВ булан ярышланы вакътисинде.
