2003-нчю йылны июль айыны 10-нда Дагъыстан Конституция жыйыны респуб­ликаны янгы Конституциясын къабул этген. Халкъгъа билдирилген гюн – 26-нчы июль Дагъыстанны аслу пачалыкъ байрамларыны бириси деп гьисап этиле.

Дагъыстан Республиканы Конституциясыны 19-нчу статьясында язылгъан кюйде, адамны ва ватандашны ихтиярлары ва эркинлиги законланы маънасы ва къолланыву, ерли гьакимият къурумланы гьаракаты булан яшавгъа чыгъарыла. Конституцияны 38 – 40-нчы статьяларына асасланып, рес­публиканы социал политикасына кюрчюленип, яшавлары осал агьлюлени гьайын­ этип олагъа кёмек этив къуллукълар да кютюле.

Бизин республиканы Аслу законуну 20-нчы статьясына гёре пачалыкъ борч­ланы инг аслусу адамны ва ватандашны ихтиярларын, эркинлигин сакълав булан байлавлу. Шо буса демократия халкъгъа береген бары да яхшылыкълагъа баш болуп токътай деп эсгерме тюше. Шо – бизин жамиятны сыйлы байлыгъы. Шо байлыкъны аманлыгъын якъламакъ учун пачалыкъ къурумлар булан бирге жамият къурумлар да халкъгъа онгайлыкълар болдурма борчлу.

Набиюлла МАГЬАММАТОВ.