Тюрклени Президентини баш ойчусу Ялчын Топчу Дагъыстан-дагъы «Солтанмут» деген инсаплы фондну вакиллерин къабул этген.

– Кавказ дав токъталгъан 1864-нчю йылда Россиядан чыкъгъан къумукълар тюрк топуракъларда яшама башлагъанлар, – дей Ялчын Топчу. – Аслу гьалда олар Анатолия деген бойдагъы Чанаккале – Бига юртланы айланасында ерлешгенлер. Биринчи дюнья давда къумукълар тюрклеге инбаш таяп дав этгенлер ва Тюркияны азатлыгъы учун къан да тёкгенлер.

Биз, къумукълар, аслу гьалда Дагъыстанда, шолай да Россияны гьисабындагъы Мычыгъыш республикада ва Осетияда яшай­гъанны да билебиз, экономика оьсювде, яшавлукъда, политикада ва маданиятда оьзлени ерин тапгъангъа сююнебиз. Мен сизин Тюркияны Анкара шагьарында ерлешген Президент къалада къабул эте туруп, «хошгелдигиз» деме сюемен. Бизде ер тербенгенде «Солтанмутну» фонду этген инсаплы ишлени де унутмагъанбыз.

Огъар жавап бере туруп, «Солтанмут» фондну ёлбашчысы Надирсолтан Абдурагьманов оьзлени къабул этген саялы Ялчын Топчугъа баракалла билдирген.
–Ер тербенген деп эшитгендокъ, биз, «Солтанмут» фондну вакиллери, жан къардашларыбызгъа къыйын гюнлерде Тюркиягъа гелдик ва къолубуздан гелеген къуллукъну этдик. Кёп адамгъа аш бердик, бузулгъан бир нече межитни ярашдырдыкъ ва янгы межит де къурдукъ. Биз арекде бусакъ да, юрегибиз булан ювукъдабыз. Тюркияны президенти болуп Режеп Тайип Эрдоган сайлангъанны арив гёрдюк ва огъар оьзюбюзню саламларыбызны йиберебиз.
Ёлугъувну ахырында Н.Абдурагьманов Ялчын Топчугъа Дагъыс­тандан алып гелген милли опуракъ савгъат этди.