Буйнакск районну Атланавул юртунда яшайгъан Шамсутдин ва Равзанат Уланбиевлени татывлу, дос агьлюсюнде бирини артындан бири дегенлей З улан тувгъан. Олар оьзлени къысматларын Ана Ватаныбызны якълавчулары гьисапда асгер бёлюклерде къуллукъ этивге багъышлагъанын англагъанда, оланы ата-анасы булан ёлугъуп лакъыр этме токъташдым.

 Шамсутдин ва Равзанат ата юртундагъы орта школада охуп, бирче де битдиргенлер. Гележек яшавун юрт хозяйство ишлер булан байлама токъташгъан Шамсутдин Вологда шагьарда юрт хозяйство техникумгъа тюшюп зоотехникни касбусуна ес бола ва Ленинград областда асгер къуллугъун кютюп къайта. Равзанат буса агрономну касбусун танглай ва Дагъыстан юрт хозяйство институтну битдире. 1985-нчи йыл бир-бирин ушатып торайгъан улан да, къыз да уьйленелер ва Вологодск областдагъы Верховажск районну Спутник деген юртуна гёчюп, мундагъы «Ленинни эсделиги» деген колхозда ишлеме башла­гъанлар. Арадан беш йыллар оьтгенде буса, оьзлеге уьч улан тувуп уьюн толтургъан яш агьлю ата юрту Атланавулгъа къайта ва дос-къардашны арасында яшавлукъ этме башлай.

1986-нчы йыл тувгъан уллу уланы Абдулла юрт школаны, ондан сонг Дагъыс­тан педагогика институтну юристлер гьазирлейген факультетин заочно охуп битдире. Узакъ къалмай ону асгерге къуллукъ этме чакъыралар. 2004-нчю йыл ол Мурманск шагьарда яяв асгерлени денгиз бёлюгюнде къуллукъ эте туруп, дыгъар байлай. 2014-нчю йыл ол асгер ёлдашлары булан бирге Украина бойда башланма турагъан дав гьаракатланы алдын алма бакъдырыла. Шонда юрюлген дав гьаракатларда оьзюн игит кюйде тутма ва гёрсетме бажаргъан Абдулла Уланбиев Россия Федерацияны Президенти В.В.Путинни 2015-нчи йылны 23-нчю ноябринде чыкъгъан Указына гёре Къоччакълыкъны ордени булан савгъатлангъан.

Бираз алда асгерлик борчун оьр даражада, намуслу кютеген Абдуллагъа лейтенант чин берилген. Абдулланы агьлюсю Залиха, къызлары Кумсият ва Аминат ону булан герти кюйде оьктем болалар.

Шамсутдинни ва Равзанатны экинчи уланы Салавутдин 1987-нчи йыл тувгъан, юрт школада охугъан, Буйнакскидеги юрт хозяйство коллежни, Дербентдеги педагогика училищени физкультура бёлюгюн заочно битдирген. 2007-нчи йыл ол асгерге чакъырыла ва йыракъ Приморск крайда денг­изягъа яяв асгер бёлюкде йыл ярым къуллукъ эте ва дыгъар байлап, Мурманскидеги асгер бёлюкге чыгъа. 2022-нчи йыл ол да Украина бойда юрюлюп турагъан дав гьаракатланы алдын алмакъ учун йибериле ва бугюнге ерли лейтенантны чининде разведкада къуллукъ эте.

Салавутдин Уланбиев Ватаныны алдындагъы асгер борчун намусу булан кютегенликге, оьзюн къоччакъ кюйде тутагъанлыкъгъа ол лайыкълы болгъан. 2022-нчи йылны 15-нчи октябр­инде В.В.Путинни Указы булан берилген Суворовну атындагъы ва «Давда айрыча гёрсетген къоччакълыгъы учун» деген медаллар арив шагьатлыкъ эте.

Салавутдинни агьлюсю Марьям, къызлары Юлдуз ва Лайла, уланы Амир атасы Ватанны алдындагъы борчларын кютюп эсен-аман асгер бёлюгюне къайтар гюнню сагъ­ы­н­ч­лы кюйде къаравуллай.

Уланбиевлени уьчюнчю уланы Алавутдин 1993-нчю йыл тувгъан. Юрт школада, Буйнакскидеги юрт хозяйство коллежде, Дербентдеги педучилищени физкультура бёлюгюнде заочно охугъан. 2012-нчи йыл ол асгерге чакъырыла ва Мурманск шагьардагъы асгер бёлюклерде агъаларыны ягъында дыгъар байлап къуллукъ этме башлай. Бугюнлерде Алавутдин Уланбиев Херсон шагьардагъы яралыланы багъагъан бёлюклени бирисинде медицина къуллукъчуну борчларын кюте.

Украина бойда тамурлашып турагъан миллетчилер ва оланы тыш пачалыкълардагъы якълавчулары юрютеген дав къалмагъаллар токъталып, Ватанны аманлыгъы учун къан тёгюп, сан сёгюп ябушагъан минглер булангъы асгерчилер эсен-аман парахат яшавгъа къайтар гюнню оланы аявлу ата-аналары, дос-къардашлары йимик, Алавутдинни агьлюсю Ругьаният ва уланы Арслан да къаравуллайлар.