Октябр айны 16-сында Буйнакск район администрацияны жыйынлар болагъан гиччи залында Дагъыстанны Башчысыны янындагъы Тамазалар советини сиптеси булан бирикген маълумат гюню иш башлады.
Шогъар багъышлангъан жыйында Дагъыстан Республиканы Халкъ Жыйыныны Председатели Хизри Шихсайитов, Тамазалар советини члени Айгум Айгумов, республика парламентини вице-спикери Камил Давдиев, депутатлар Людмила Авшалумова, Биярслан Изиев, Баттал Батталов, Буйнакск шагьарны ва районну башчылары Исламутдин Нургудаев, Камил Изиев, Буйнакск районну ва шагьарны депутатларыны, тамазалар советлерини ва жамият палаталарыны вакиллери де ортакъчылыкъ этдилер.
Жыйынны ача туруп, Хизри Шихсайитов булай деди: «Гьакимият ачыкъ ва таза болмагъа тарыкъ. Шону учун халкъны, айрокъда уллуланы, абурлу адамланы оюна, сёзюне биз барыбыз да яхшы къулакъасмагъа герекбиз».
Сонг ол Буйнакск шагьаргъа ва районгъа республика бюджетден таман чакъы акъча маялар йиберилгенни, халкъгъа пайдасы тиеген затланы этивню ёлунда шо маяланы асувлу кюйде къоллама тюшегенни айрыча агьамият берип эсгерди.
Республиканы Тамазалар советини члени, Россия Федерацияны халкъ артисти А.Айгумов шагьарланы, районланы ватандашларындан кёп арзалар болагъанны ва шоланы барысына да Дагъыстанны Башчысы тергев берегенни эсгерди.
Жыйынны барышында шагьарны ва районну башчылары И.Нургудаев, К.Изиев ва оьзге ёлдашлар да чыгъып сёйледилер. Артдагъы вакъти янгы яшлар бавлары, школалар кёп ишленегенни, ёллар къурулагъанны ва янгыртылагъанны разилик булан эсгердилер. Мунда айтылгъаны йимик, районну ва шагьарны агьамиятлы масъалаларын чечивде Хизри Исаевич Шихсайитовну кёп кёмеклери тиегенни мисаллар булан исбат этдилер.
Оьзлени сёйлевлеринде К.Давдиев, Л.Авшалумова ва башгъалары жамият ва гьакимият гьакълашып бирче иш гёрегенликни уллу агьамияты бар экенни айтдылар.
Жыйында болгъан гьакълашывну жамын чыгъара туруп, Хизри Шихсайитов:
– Халкъны ичинбушдурагъан масъалаланы гьакъында билмек бизин учун аслу борчдур. Шону бажарсакъ, масъалаланы да ортакъ гючлер булан арив чечме боларбыз, – деди.
Жыйындан сонг Х.Шихсайитов Буйнакскини арив этип онгармакъ учун ишленип турагъан объектлерден айланып чыкъды. Артда шагьардагъы уллу базаргъа барды, сатыв ишлер нечик салынгъанны, багьалар нечик экенни сорап къарады.
Бизин маълумат.
