Юртлуланы яшавлукъ шартларын яхшылашдырмакъ учун

Юртлуланы яшавлукъ шартларын яхшылашдырмакъ учун

 

Россияда Дагъыстан аграр республика гьисапда танывлу. Дагъыстанда яшайгъан 3 миллионгъа ювукъ адамланы авадан пайы, 60 процентге ювугъу, гьалиги заманда юрт ерлерде яшай. Буса да, артдагъы вакътилерде савлай Россияда йимик бизин республикабызда да юртлу ватандашланы башалман кюйде шагьарлагъа гёчювю давамлашагъаны ойлашдырмай болмай.

 

Шону гьисапгъа алып, юрт ерлени оьсдюрюв бугюн бизин уьлкебизде пачалыкъ аманлы­гъыны оьлчевюндеги агьамиятлы масъала болуп токътагъан. Муна шо саялы да юрт ерлерден башалман кюйде шагьарлагъа гёчювню алдын алмакъ учун, гьечден геч де къолай дегенлей, юртлуланы яшавлукъ шартларын яхшылашдырмакъ учун пачалыкъны янындан бир къадар чаралар гёрюлегени тергевню тартмай болмай.


Бу йылны башындан тутуп, савлай Россияда харжлагъа харлы тайпалар 1 процентлик юртлу ватандашлар учунгъу ипотекадан пайдаланмагъа болажакъ. Шо гьакъда Россия Федерацияны юрт хозяйство министерлигини янындагъы юрт ерлени оьсдюрювню масъалаларына къарайгъан къуллу­гъуну директору Максим Боровой уьлкебизни регионларыны аграр тармагъыны башчыларына баянлыкъ этген.


Шолайлыкъда, 2025-нчи йылгъа ерли юрт ерлерде яшайгъанланы гелимлерин шагьарларда яшайгъанланы гелимлерине тенглешдирмек мурат булан 68 процентден 75 процентге ерли артдырмагъа умут этиле. Шону учун пачалыкъны янындан 1 процентлик ипотека харжлар 1 триллион 38 миллиард манатны оьлчевюнде гёз алгъа тутулгъан.


Россияны юртлу ватандашлары учун шолай онгайлы ипотека харжланы 1 триллиону федерал бюджетден таба ­айырылагъаны гьакъда айрыча эсгерме тюше. Юрт ерлерде яшайгъанлар шолай енгил ипотека харжлардан пайдаланма умут эте буса, о гьакъда эркин кюйде маълумат «Россельхозбанкны» хас сайтында ерлешдирилген.