Буйнакск райондан барып Дагъыстанны Кочубей боюндагъы, Къалмыкъ Республиканы Уланхол, Ставрополь крайны Бакресск бойларындагъы гёчювюл отлавлукъларында къой сиривлер сакълайгъан ёлдашлар гьали де бар. Алдын районну тышдагъы къой къотанлары гьалиден эсе кёп эди.
Буйнакск районну юрт хозяйство бёлюгюню касбучу къуллукъчулары, эсгерилген бойлагъа барып, ишлени гьалын ахтарып къарагъанлар.
Эсгерилген районну юрт хозяйство бёлюгюню башын тутгъан Магьаммат Гьажимурзаев айтагъан кюйде, къыш юваш болгъаныны яхшылыгъындан гьайван-малны къышлаву бу гезик, кёп авараларсыз арив оьтген. Тёлню гьасиллери де яман тюгюл. Буйнакск райондан тышдагъы къотанларда буссагьат 6,2 мингден де къолай къара тувар, 120 мингден артыкъ мал сакълана. Гёчювюл отлавлукълардагъы къойлардан алынгъан къозуланы санаву да гьалиге 43 мингден оьте.
– Бу йыл къышлавну гьасиллерине гёре оьзлеге Сулейман Къурагьмаев, Гелемет Магьамматов, Муслим Омаров, Багьавутдин Исрапилов, Ильяс Гьажиев, Магьаммат Исрапилов башчылыкъ этеген къой къошланы загьматчылары гёрмекли натижаланы къолда этгенлер. Биз энни районну оьзюню ичинде ерлешген къотанлардагъы ишлерини барышы нечик экенин тергеп турабыз.
Талги, Экибулакъ бойлардагъы гьайванчыланы, къойчуланы янында да болдукъ. Сапаралидеги гьалны да гёрдюк. Шо ерлерде Юсуп Абдуллаев, Мурат Гьажиев ва оьзгелери башын тутгъан фермалардагъы ишлеге багьана ёкъ, – деп билдирди бизге Магьаммат Гьажимурзаев.
Районну юрт хозяйство бёлюгюню касбучулары токъташдырагъаны йимик, бизин табиат ва гьава шартларда малланы дагъыстан тав журасын болгъан чакъы къолай сакъламакъны маънасы да, пайдасы да бар. Неге тюгюл, жынслы маллар гёчювюллеге де, тав шартлагъа да чул бермей. Шолагъа бизин якъны шартлары арив яраша. Къойчуланы сынавлулулары шону агьамиятын тындырыкълы англайлар.
– Бизин районда тезден берли де малчылыкъ булан машгъуллугъун къоймагъан, шо къыйын, тек хайырлы касбуну тухум къайда да наслудан- наслугъа къоюп юрютегенлер де бар. Олай дегенде, Оьр Къазанышдан Акашевлени, Гьажиевлени, Чиркейден Ацаевлени, Абуриковланы, Къурагьмаевлени, Шабашевлени, Делиляевлени, Атланавулдан Алиевлени, Янгы Къумукъдан Элдарушевлени ва кёп оьзгелени атларын айрыча эсгермеге тийишли.
Тышдагъы гёчювюл топуракълардагъы ва районну ичиндеги къотанларда, фермаларда тёл гьали де байып битмеген. Тек шону гьасиллери арив болажагъын гьалиденокъ да эс этмеге бажарыла. Къыйынлыкълагъа да къарамай, гьакъыкъатда иш торайтагъан адамланы хадирин билеген кюйню этсек, хайырлы ишлени къадары да яхшы болажакъ, – деди, мени булангъы лакъырын тамамлай туруп, М.Гьажимурзаев.
Абдулла БУГЛЕНЛИ.
