Сергей Меликовну ёлугъуву

27 сентября 2022 в 12:59 21
Сентябр айны 20-сында Дагъыстан Республиканы Башчысы Сергей Меликов Украинада хас асгер операцияны вакътисинде оьлген дагъыстанлы яшланы ювукъ агьлю къардашлары булан ёлукъгъан. Ёлугъувну алдында регионну ёлбашчысы оьлген асгер къуллукъчуланы суратларыны янына чечеклер салгъан. О гьакъда республиканы Башчысыны прес-къуллугъу билдире.

Гелгенлеге къайгъырыш сёзлерден сонг Сергей Меликов: «Биз сизин уланларыгъыз, эркъардашларыгъыз, аталарыгъыз булан, гьали де бизин элни аманлыгъы учун жанларын да къызгъанмай кёп адамланы оьлюмден къутгъарагъанлар булан оьктем болабыз.

Хас операция ярым йылдан да артыкъ юрюлюп тура, биз гёребиз душманланы Россиягъа къаршы къурулгъан, кёп алгъа гёзленген уллу умутлары бар. Бизин асгер къуллукъчуларыбыз, жанларын къурбан этме де къайырмайлы, дазуланы  сакълай, душман булан ябушув юрюте. Россияны харлысызлыгъын сакъламакъ учун алданокъ шулай гьукму болмагъан эди буса, дав агьвалатлар бизин топуракълагъа да гележек эди. Огъар бир де шеклик ёкъ. Хас асгер операцияны вакътисинде оьлгенлер, гьали де оьз Ватанын якълап дав юрютегенлер, савлай уьлкени аманлыгъы булан бизин де сакълай», – деп билдирген.

Дагъыстан Республиканы Башчысы бирдагъы тирет билдирген кюйде, оьлген асгер къуллукъчуланы агьлюлерине кёмек Владимир Путинни таклифи булан федерал оьлчевде этиле. Ол эсгерген кюйде, оьлгенлени агьлюлерине гьай этив къуллукъ да оьр даражада юрюлме тарыкъ. Ерли муниципалитетлени башчылары да шогъар тийишли агьамият бермеге борчлу.

Дагъыстан Республиканы асгер комиссары полковник Дайитбек Мустафаев ва Дагъыстан Республиканы загьмат ва социал оьсювюню министри Абдурагьман Магьмутов да шо ёрукъда юрюлеген кёмек ишлени барышыны гьакъында айтгъан. Ондан къайры да, рес­публиканы Гьукуматыны членлери ёлугъувну вакътисинде арагъа чыкъгъан масъалаланы бирин де къутгъармай къабул этгенлер. Оланы яшавгъа чыгъарылывуну гьай этиливюн де оьзлени тергевюню тюбюне алгъан.