Сергей Меликов булан ёлукъгъан

Белгили экени йимик, сакъатланы «Язбаш» деген жамиятыны янындан бизин республикада биринчилерден болуп яшавлукъ онгайлыкълагъа гьажатлы адамлар учун ял алыв базаны мекенли кюйде къурашдырмакъгъа ва ясандырмакъгъа артыкъ тергев бериле.

Артдагъы вакътиде юрюлеген шо умпагьатлы гьаракат янгыз бизин районну тюгюл, республиканы оьр даражадагъы гьакимлик къурумларыны янындан да якълав таба. «Язбаш» деген сакъатланы жамиятыны ёлбашчысы Али Мусаев асгер къуллукъчуланы, олай да Украинада юрюлеген хас гьаракатны ортакъчыларыны савлугъун беклешдиривге байлавлу проектни яшавгъа чыгъармакъ учун Дагъыстанны Башчысыны грантына лайыкълы болгъаны да шону исбатлай.

Алдагъы гюнлерде Дагъыстанны Башчысы Сергей Меликов эсгерилген жамиятыны вакиллери булан оьтгерилген ёлугъувуну вакътисинде де оьрде айтылагъан проектни яшавгъа гийиривню шартларын арагъа салып ойлашылгъан. Шо ёлугъувну барышында эсгерилген жамиятыны ёлбашчысы  Али Мусаев Дагъыстанны Башчысы Сергей Меликовгъа оьзлени къаст этивюн якълайгъаны, олай да сакъатланы ишлерине къарайгъан совети янгыдан иш башлагъаны саялы разилигин билдирген.

Оьзюню гезигинде Дагъыстанны Башчысы «Язбаш» деген жамияты гёз алгъа тутгъан муратларын яшавгъа чыгъарывда тийишли гьакимлик къурумларына гьар не якъдан да болушлукъ этмекни тапшургъан.