Сентябр айны 27-синде Донецк, Луганск халкъ республикаларда ва асгер операцияны вакътисинде бизин асгер гючлери националистлерден азат этген Херсон, Запорожск областланы территорияларында халкъ Россияны составына гирме сюегенликни токъташдырмакъ учун оьтгерилген референдумланы гьасиллери белгили болду.
Ерли сайлав комиссиялардан билдиреген кюйде, Донецк халкъ республикада сайлавларда ортакъчылыкъ этген сайлавчуланы 99,23 проценти оьзлени республикасы Россия Федерацияны составында болгъанны сюебиз деп тавушлар берген. Луганск халкъ республикасында оьтгерилген референдумну гьасиллерине гёре шо санав – 98,42 процент. Херсон областда – 87,05, Запорожск областда буса сайлавлагъа гелип тавуш бергенлени 93,11 проценти оьзлени къысматын гележекде Россия пачалыкъ булан байламагъа сюе.
Тюзюн айтса, гиччи республикалар къайсы да бир уллу пачалыкъгъа таянып, ону къанатыны тюбюне гирип яшамаса бажарылмай. Халкъларыны яшавлукъ масъалаларын толу кюйде чечмек учун шолай ёл талап этиле. Бу республикаланы ва областланы ватандашларыны да, балики, Украинадан эсе Россия къолай деп эсине гелгендир. Россия − оьзюню табии байлыкъларын гьисап этсе де, гючлю гележеги бар пачалыкъ.
Оьрде эсгерилген республикаларда ва областларда оьтгерилген референдумланы гьасиллери булан, озокъда, Американы Бирлешген Штатларыны гьалиги администрациясы рази болмажагъы алда да мекенли эди. Шолай, огъар тынглап юрюйген бир-бир пачалыкъланы вакиллери де ООН-ну аманлыкъ советинде чыгъып сёйлеген ва гьасиллени къабул этмейгенин билдирген.
Миллетлени бирлешген къурумундагъы Россияны элчиси Василий Небензя билдирген кюйде, сайлавларда тергев юрютеген дюньяны 40 уьлкесинден гелген 100-ден де артыкъ адам болгъан. Сайки, оланы пикрулары гьисапгъа алынмай.
