Ноябр айны 2-синде Дагъыстан Республиканы асгер комиссары Даитбек Мустафаев дагъыстан журналистлер булан пресс-конференция оьтгерди. Ол эсгерген кюйде, бу йылда оьтгерилеген асгерге чакъырыв компания бир айгъа артгъа теберилген. Ону да себеби гетген айда асгер комиссариатланы иши къыставуллу болгъаны булан байлавлу.

Бу йылда бизин республикадан Россияны армиясыны сыдраларында заманлыкъ асгер къуллукъну кютмек учун йыллары етишген жагьиллерден 3 минг 500 яш чакъырылажакъ. Савлай Россияда шо санав 120 мингге тенг. Гетген йыл булан тенглешдиргенде 7минг 500 адамгъа аз. Асгер комиссар билдирген кюйде чакъырылгъанлгъан яшлар, энни Рооссияны составына гиреген Донецк, Луганск, халкъ республикалагъа ва Херсон, Запорожск областлагъа йиберилмей.

Даитбек Мустафаев бирдагъы билдирген кюйде гюзде оьтгерилеген чакъырыв компания къурумлу кюйде оьтсюн учун бары да тарыкъ-герек алданокъ гьазирленип онгарылгъан. Ондан къайры да гьаракатгъа республиканы иш юрютювчю къурумлары ва олай да жамият къурумлар да къуршалгъан.
«Тергев этгенигизни сюемен, повестка тапшурулгъанда, эгер де огъар оьзюрюлюк болмай туруп заманында военкоматгъа гелмегенлик законну бузагъанлыкъ бола. Шолайлар жавапчылыкъгъа тартылажакъ. РФ-ни асгер гючлеринде къуллукъ этмек, гьар бир ватандашны да сыйлы борчу» деп билдирди республиканы асгер комиссары.

Янгы чакъырылагъан яшлар асгер заманы битгендокъ уьйлерине къайтажакъ. Тек олар оьзлер сюйсе, къуллукъ башлап 3 айдан сонг, асгер командование булан дыгъар байлап «контрактниктлер» деп айтылагъан категориягъа къошулма да бола. Шо выакъти олагъа хас операцияда ортакъчылыкъ этме имканлыкъ тувула.

Армиядан къайтгъанда, гетген ерине къайтып гелип учётгъа гирмек де борч тюгюл. Сюйген регионгъа барып, онда учётгъа гирме де ярай. Мердешленген кюйде гьар йыл язбашда ва гюзде асгерге чакъырылывну бу йыл оьтгерилеген кююне гёре англашылмайгъан ерлери бар буса, 122 номерге телефон сёйлеп билме бола.