Артдагъы йылларда Дагъыстанда «Агропромышенный тармакъны асувлулугъу учун» деген милли проект пайдаландырыла. Шонда белгиленген жаваплы борчланы уьстюнлю кюйде яшавгъа чыгъарылыву юрт хозяйство тармакъда чалышагъан касбучуланы бажарывлулугъундан да гьасил болагъаны англашыла. Демек, илмуну ва сынавну арасындагъы байлавлукъланы камиллешдиривден кёп зат гьасил бола.
Бугюнлерде «Дагестанская правда» газетни жыйынлар залында оьтгерилген конференция да шолай агьамиятлы масалагъа гёре багъышлангъан эди. Шогюн Дагъыстанны Магьаммат Жамболатовну атындагъы пачалыкъ аграрный университетини ректору Зайдин Жамболатов арагъа салынгъан агьамиятлы масалагъа байлавул болуп оьз пикруларын малим этди ва шолай да ахырында республикабызны маълумат къуралларыны къуллукъчулары берген соравлагъа гёре жаваплар къайтарды.
– Дагъыстан Россияны къыбла боюнда ерлешген аграр республика, – деди ол оьзюню баянында, – шону учун хас милли проект де къабул этилинген. Агьамиятлы проектде де агропромышленный тармакъны асувлулугъун артдырмакъ учун касбучуланы гьазирлевге пачалыкъны янындан нечик агьамият берилегени англашыла. О саялы да бизин оьр охув ожакъда агрономланы, ветеринар врачланы, зоотехниклени, экономистлени ва оьзге юрт хозяйство касбучуланы билимлерин касиллешдирив де аслу борч болуп токътай. Иш шону булан да битмей, охувдан сонг олар сынавда, призводствону гьар тюрлю бёлюклеринде олар оьз билимлеринден некъадар пайдалангъаны гьакъда да биз гьар тюрлю юрт хозяйство предприятиелер, жамиятлар, кооперативлер булан байлавлукъланы уьзмей иш гёрмесек бажарылмай. Айлана якъдагъы талапланы гьисапгъа алып бизин охув ожакъны кюрчюсюнде де мердешли тармакъланы асувлулугъун къолайлашдырмакъ учун оьсюмлюкчюлюкде ва гьайванчылыкъда болдурулагъан продукцияны ишлетеген сынав цехлер, производство бёлюклер пайдаландырыла. Шолайлыкъда, студентлерибизни билимлери сынав дарсларда танглагъан касбусуна гёре беклешегени гьакъда да айрыча эсгермеге герек бола. Сонг да, бизин оьр охув ожакъны тамамлап чыкъгъанланы 50 процентден къолайы танглагъан касбусуна къуллукъ эте.
Гертиден де, гьар йыл бизин республикабызны юрт хозяйство тармагъыны асувлулугъун артдырмакъ учун федерал ва республика бюджетлерден ломай харжлар гёрсетилине. Милли борчлар, федерал ва регион программалар пайдаландырылагъаны гьакъда унутма тюшмейгени гьакъда ва шолайда агротуризмни оьсювюн къолайлашдырывгъа байлавлу масалаланы гьакъында да оьтгерилген прес-конференцияда айрыча эсгерилди.
Дагъысын айтмагъанда, 2021 йылгъа да шону учун регион ва федерал бюджетлерден 4.3 миллиард манат акъча маялар гёрсетилинген.
