Арбагюн, март айны 15-нде, «Дагъыстан» деген маълумат агентлигинде Дагъыстанны билим беривге ва илмугъа къарайгъан министри Ягьия Бучаевни прес-конференциясы болду.
Бизин республиканы маълумат къуралларыны вакиллери булан оьтгерилген шо ёлугъувунда ол оьтген йылда билим берив тармакъда юрюлген гьаракатны гьасиллерин чыгъарып сёйледи. Шону булан бирге Муаллимни ва насигьатчыны йылы гьисапда бу йылны ичинде яшавгъа чыгъармагъа гёз алгъа тутулгъан гьаракатлар малим этилди.
Министрни сёзлерине гёре, билим берив тармакъда 2022-нчи йылда айрыча кёп иш этилген йыл болду. Ачыкълашдырып айтгъанда, инг алда эсгерилген министерлик сиптечилик гёрсетип, бизин республиканы бары да дегенлей муниципал къурулувлары булан касбучуланы танглавгъа байлавлу гесимлени токъташдырагъан дыгъарлар байлангъан. Шо дыгъарлагъа гёре билим берив идараларыны касбучуларын танглайгъанда токъташдырлгъа бир ёрукъгъа гёре иш гёрмеге тюшежек. Шо да ёлбашчылыкъ къуллукълагъа бажарывлу касбучуланы белгилевге болушлукъ этежек.
Бу йыл билим берив тармакъда кютюлмеге тюшеген ишлени гьакъында айта туруп, Ягьия Бучаев билдиргени йимик, республика оьлчевюнде оьтгерилежек гьаракатланы санаву 60-гъа етише. Шондан къайры да, министерликни сиптечилиги булан дагъы да 30 гьаракат юрюлежек. Шоланы яшавгъа чыгъарывда Дагъыстанны Башчысы Сергей Меликов ёлбашчылыкъ этеген хас комитет къурулгъан.
Мухбирлени соравларына жавап бере туруп, министр бизин республика учун артдагъы йылланы ичинде агьамиятлы болуп токътагъан ана тиллени сакълавгъа байлавлу не къадар гьаракат юрюлмеге тюшегени гьакъда да оьзюню пикрусун айтды. Ону пикрусуна гёре, тувулунгъан шартланы гьисапгъа алып, ана тиллени уьйренивге дарсланы вакътисинде берилеген тергев азлыкъ эте. Гьар халкъны ругь байлыгъына торайып гелеген наслуну иштагьландырмакъ учун охув ожакъларда иш гёреген театрланы, олай да яй айларда яшланы ял алыв лагерлерини имканлыкълары булан толу кюйде пайдаланмагъа тюше.
Шондан сонг да, ол охув китапланы сатыв алывгъа байлавлу масъаланы уьстюнде айрыча токътады. Министр англатгъан кюйде, дёрт йылда бир керен охув программалар алышынагъангъа гёре, китапланы сатып алывда бир тюрлю четимликлер тувулуна.
Шону булан бирге ол оьр охув ожакъда яшавгъа чыгъарылажакъ бир тюрлю алмашынывлар бажарывлу яш касбучуланы гьазир этип чыгъарывгъа болушлукъ этежек. Бирикген пачалыкъ экзаменлер де яш адамлагъа оьзлер билим алмагъа иштагьлы оьр охув ожакъда мекенли ёллар ача. Булай алгъанда, билим беривде юрюлеген бары да алмашынывлар эсгерилген тармакъдагъы ишни камилликге элтивге бакъдырылгъан.
