Биринчи оюнну артдагъы янгурлардан гьайран сув болуп, ойнамагъа бек четим футбол майданда «Анжи» команданы футболистлери кёп гьаракат этип, бажарывлу ва арив оюн да гёрсетип, 4:0 санав булан «Зенитни» енгип болду буса, экинчи оюнда «Краснодар» булан 0:0 санав булан ничья этип токътады.
Кубокгъа «Зенит» булан ойналгъан биринчи оюнунда бизинкилени аслу составындагъы 5 оюнчусу майдангъа чыкъмады. Тек оланы алышдыргъан оюнчулар гёрсетген оюн команданы аслу составындагъыланыкинден бир де къалышмай эди. Бизин жагьил футболистлер ёлугъувну макъталгъан къонакълардан бир де тартынмай башлады. Бир-эки къолдан чыкъгъан къоркъунчлу мюгьлетден сонг, оюнну 29-нчу минутунда Шамил Гьасанов оьзюню премьер-лигада «Анжини» составында биринчи голун гийирди. Майдангъа аслу составын чыгъаргъан къонакълар тезлик булан санавну тенглешдирме къарады. Пайда болмады, «Анжини» якълавчулары янгылыш этмей, уста кюйде ойнады. Шолай биринчи тайм да битди.
Экинчи тайм башланып аз да гетмей, оюнну баш судьясы, бизин чапгъынчы Будковскийни чатакъ салып йыкъгъан къонакъланы къапучусу Кержаковгъа къызыл карточка гёрсетип, ону майдандан къувалады. Командасында он футболист тюгюл къалмагъан «Зенит» шо мюгьлетден сонг сёнюп къалды.
Оюнну 62- нчи ва 69-нчу минутларында Будковский, 79 -нчу минутунда буса Бернард Бериша санавну 4:0 гъа чыгъарды. Бу сезонда бир де биревге де утдурмагъан «Зенитни» футболистлери къарсалап ойнап башлады. Шолайлыкъда, бизин Гьажибеков да, къонакъ Жулиано да оюн битмеге аз къалгъанда ябушуп, судьядан къызыл карточкалар да къазанды.
Шолайлыкъда, оюн 4:0 санав булан бизинкилени пайдасына тамамланды. «Зенит» 4:0 санав булан 2013-нчю йылдан берли биревгеде утдурмайлы ойнап, бизинкилерден енгилгенине къаравчуланы кепине гелди деп айтмагъа ярай.
«Краснодар» булан Россияны чемпионатына ойналгъан оюн буса биринчи оьрде эсгерилген оюнгъа аз да ошамады. Савлай 90 минутну ичинде оюнгъа чинк де аслу составы булан чыкъгъан «Анжи», къонакъланы къапусуну алдында топ гийирер йимик бир мюгьлет де тувдуруп бажармады. Къонакъланы буса эки шолай мюгьлети болду. Бизин команданы голдан къапучубуз Беленов къутгъарды.
Оюнну 17 -нчи минутунда эки сари карточка, сонг къызылын алып майдандан къонакъланы ярымякълавчусу Каборени къувалангъан сонг оюн майданда оланы он футболисти къалды. Шо да бизинкилеге оюнну утмагъа кёмек этмеди.
Уьч гюнню ичинде бир команда ойнагъан оюнлар шонча да бир-бирине ошамады. Тек, тюзю, бизин команданы къастына, гьаракатына багьана тапма къыйын, гьаракат булан къаст нечакъы да этилди, тек пайда чыкъмады. Футболда олай да болагъангъа, шо оюнну миллионлар булан къаравчулар шо саялы да сюе болмагъа да ярай.
Шарапутдин КИШИЕВ.
