Бугленде Дагъыстанны биринчи профессионал кочабы болгъан Ал-Кълыч Хасаевни аты къоюлгъан мукъаятлы спорткъалада гьар йыл, Дагъыстан Республиканы Халкъ Жыйыныны Председатели Хизри Исaаевич Шихсайитовну савгъатларын алмакъ учун, тутушуп ябушувдан «А» деген даражагъа гиреген ХYI ачыкъ ярыш эки гюнню узагъында юрюлдю.
Бу гезикги ярышгъа Россияны кёп тюрлю ерлеринден ва гьатта тыш пачалыкълардан гелген хыйлы кочаплар бар эди. Дагъыстанны, Темиркъазыкъ Кавказны районларындан ва шагьарларындан мунда гюч сынама гелгенлер айрокъда кёп эди. Гьасили, 200-ден де къолай кочап 57, 66, 74, 86, 97 ва 125 кило авурлукълагъа гёре уьстюнлюкге ес болмакъ учун тогъатартдылар.
Спорткъаланы тышы булан ичи онгарылгъан кюйге къарагъанда, бу ярышгъа тындырыкълы гьазирленгени мунаман деп гёрюнюп тура эди. 2 гюнню узагъында къаланы ичи ярышлагъа къарамагъа гелген уллулар булан яшлардан тыгъылып толуп турду.
Ярышланы гиришив ва къутлав сёз булан Буйнакск районну баш гьакими Камил Изиев ачды, спортчулагъа ол уьстюнлюклер ёрады, Шихсайитовну турнирини «дазулары» йыл сайын генглешегенни, спорт халкъланы дослугъун кюйлейген сыналгъан маяланы бириси экенни эсгерди.
Сонг районну бийив ансамбли, гьаман да йимик, арив бийип, жыйылгъанланы къурчун къандырды. Аралашып айтылгъан йырлар да къаравчуланы ва кочапланы хошуна хош, ругьуна ругь къошду.
Артда оьзю Хизри Шихсайитов, халкъ булан саламлашып, сорашып, кёп тюрлю ерлерден гелген кочаплагъа, ярышны къурумчулукъ ишин бойнуна алып чалышгъанлагъа, ябушувчуланы тогъатартывларындан леззет алып кеп этеген къаравчуланы барысына да баракалла билдирди.
– Бу гезикги 16-нчы ярыш Дагъыстангъа басгъын этме сюйген халкъара бандитлени бирлешивюн тозгъандан берли 20 йыл битегенлик булан рас гелди. Бу ерде мен бизин спортчуларыбыз да шо авур гюнлерде оьз халкъын, элни бирлигин якъламагъа белсенип тургъанын айрыча маъна берип эсгермеге сюемен. Оьзюню харлысызлыгъын, азатлыгъын сакъламагъа къатты кюйде туруп болагъан халкъыбыз булан оьктем болмагъа бизин гьакъыбыз бар.., – деди Хизри Шихсайитов.
Сонг ол Къазахстанда дюнья чемпионатында уьстюнлюклер къазанып къайтгъан бизин кочапланы, шолай да боксдан утгъанланы атына макътавлу сёзлер айтды. Оланы савгъатлады. Тутушуп ябушувдан дюньяда 2 керен биринчи ерни алгъан Завур Угуевге буса 2 уьйлюк уьйню ачгъычлары, арив исбарлангъан шёшге, акъ ямучу тапшурулду. Шо мюгьлет халкъны харсы уллу залны янгыртып къойду.
Мердешленип гелегенге гёре, Х.Шихсайитовну атындан юрюлеген ярышда кочапланы лап гьюнерлисине автомашин савгъат гьисапда бериле. Бу гезик лайыкълы шо савгъат Хасавюртдан гелген 57 кило авурлукъдагъы Муслим Салигьовгъа тюшдю. Ол уьюне мунда оьзю ес болгъан къурчакъ йимик «КИА РИО» машинни гьайдап гетди. Алдынлы ерлени алгъан кочапланы барысына да тийишли оьлчевлерде акъча ва оьзге тюрлю савгъатлар тапшурулду. Шону булан тамамланмай, пагьмулу тренерлер Магьаммат Гьажиев, Нюрмагьаммат Нюрмагьамматов, «Спортчуланы тарбиялайгъаны, Дагъыстан Республикада физкультураны ва спортну оьсдюрювге этеген къошуму учун» деген хас кюйде онгарылгъан плакеткалар ва акъча булан савгъатландылар.
Мен бу ерде айтмагъа оравлу гёреген бирдагъы булай зат бар – къаланы тюп къатында ерлешген ашхананы уллу залында гелген чакъы халкъгъа 2 гюн гьавайын ашлар берилди. Йыракъдан гелген спортчулагъа спорткъаланы лап къырыйындагъы бинада ял болмагъа ва гече ятмагъа ерлери булан багъыйлы шартлар яратылгъан эди.
Гьасили, Х.Шихсайитовну атындагъы ярыш бу гезикде оьр даражада арив оьтдю.
А. Бугленли.
