Тазалыкъны масъалалары ахтарылгъан

Дагъыстан Республиканы Гьукуматыны Председатели Абдулмуслим Абдулмуслимов сентябр айны 14-нде ишчи сапар булан Москвада болгъан ва «Росприроднадзор» къуллукъну ёлбашчысы Светлана Родионова булан ёлугъув оьтгерген. О гьакъда ДР-ни Гьукуматыны прес-къуллугъу билдире.

Ишчи сапарны ва ёлу­гъувну аслу мурады Россия Федерацияда табии байлыкълагъа ва экологиягъа къарайгъан министерликни янындан оьтгерилеген «Генеральная уборка» деген проектде ортакъчылыкъ этмек учун республикада юрюлюп турагъан гьазирликни англатмакъ болгъан.

Ондан къайры да, А.Абдулмуслимов Росприроднадзорну ёлбашчысына Да­гъыстанда экология якъдан бар гьалны, сув идараланы тюзевлю къолланывуну ва оланы къоруп сакъланагъан кююню, жан-жанывар ва оьсюмлюклени  дюньясында тувулунагъан масъалаланы ва региондагъы чёп ташланагъан ерлени тайдырыв, тав оьзенлени сувун таза сакълав гьаракатларда ёлугъагъан четимликлени гьакъында да айтгъан.
Светлана Родионова къолланагъан сувланы тазаланыву, олай да шолай сувланы тазалайгъан ва шо ёрукъда болма тарыкълы объектлени къурулуш масъалалары нечик чечилегенни гьакъында да сорагъан.
Ёлугъувда Дагъыстан Республиканы Председателини заместители Нариман Абдулмуталибов ва ДР-ни табии байлыкълагъа ва экологиягъа къарайгъан ми­нистри Ибрагьим Ибрагьимов да ортакъчылыкъ этген.