Сергей КАСЬЯНОВ: «Къоллавчуланы арзлары тергевсюз къалмай»
Мердешленген кюйде, йылны ахырларына таба оьзге тармакъларда йимик, яшавлукъ-коммунал хозяйствода этилинген ишлени нати-жалары, йиберилген кемчиликлер токъташдырыла ва янгы йылны башларында малим этилине. Къоллавчуланы яшавлукъ-коммунал къуллукъларын кютювде де айрыча къурумлагъа ва ватандашлагъа Пачалыкъ яшавлукъ инспекцияны Дагъыстан бёлюгюню башчысы Сергей Касьянов арадан оьтген вакътини ичинде этилинген ишлерине байлавлу болуп баянлыкъ берди.
– Оьтген йыл тергев ишлер алданокъ планлашдырылгъан кююнде ва шолай да ерлерден гелеген арзалагъа гёре оьтгерилди десем, янгылыш болмай, – деди эсгерилген къуллукъну башчысы. – Айтмагъа сюегеним, оьз борчларыбызны яшавгъа чыгъарылыву къоллавчуланы арзларын гьисапгъа алыв булан тыгъыс кюйде байлавлу юрюле.
Дагъыстанны шагьарларында ва районларында адамланы ва къурумланы яшавлукъ-коммунал къуллукъларын кютеген имаратлар, ясандырывлар къоллав болжаллары къолдан чыкъгъаны саялы, чакъда-чакъда сувлар, ярыкълар, газлар къайта…
Айтмагъа сюегенибиз, озокъда, яшавлукъ-коммунал къуллукъланы кютювде пайдаландырылагъан имканлыкъланы янгы къайдалар, къураллар булан алышдырмай туруп йыл сайын артып тербейген талапланы толу кюйде яшавгъа чыгъарма четим болажагъы гьакъ. Муна шо саялы да, янгыртыв-ярашдырыв ишлер учун пачалыкъны янындан айырылагъан харжланы асувлу кюйде пайдаландырмаса, пачалыкъны ва халкъны аманлыгъын якълайгъан къурумланы ишин ёрукълашдырмаса бажарылмай, ёгъесе алдагъы кюйде къуллукъланы кютювде кемчиликлер йиберилип де къыйыкъсытылып туражакъ.
Оьзюню баянында Сергей Касьянов да шо гьакъда айта туруп, 2022-нчи йылгъа белгиленген борчланы жаваплыгъы гьакъда айрыча эсгерди.
