Бабаюртну маданият къаласыны ичине, гьали огъар «Маданият центры» дей, эки тюрлю эшиклерден таба гирме боласан. Арекден къарагъанда, олар бир-бирине къыйышмай. Муна Дагъыс­танны халкъларыны мердешлери деген шагьарча арив ясалгъан бина гёрюне. Башгъа орамдан, ерли администрацияны тувра алдындан таба да маданият къаланы ичине гиресен.

 

Бу гёрюнюш юрекни онча къувандырмай. Маданият шко­ласындагъы гьар тюрлю кру­жок­лагъа гелеген яшлар да шундан таба гире. Йигирма йыллар алъякъдан берли де шу гёрюнюш алышынмагъан.

Мен де шо эшиклерден таба гирип директорну ахтараман. Бек илиякълы тиштайпа къаршылай ва оьзлени яхшысын да, яманын да яшырмай айта. Сайида Даветеева хыйлы йыллар Бабаюрт районну маданият бё­люгюню ёлбашчысы болуп ишлеген, гьали центрны директору. Дагъыстан Республиканы маданиятыны ат къазангъан къуллукъчусу.

Ичи тамашагъа къалдырардай, уллу ва бек арив онгарылгъан залы, сагьнасы ва фойеси булангъы идара. Ону гёргенде мен къумукъланы шундан арив маданият чаралар оьтгерме жыйылагъан ери бар буса – Къумукъ театрдыр, дагъы ёкъ деп ойлашдым. Тек олай айтма сюймесенг де, бинаны бириси янына кёп йылланы узагъында ремонтлар этилмеген.

Болса да, Бабаюрт маданият къаласыны ичинде юрюлеген пайдалы ишин анализ этсенг, бизин республиканы оьзге маданият ожакъларыны арасында шо инг гёрмеклилеринден бириси экенге инанасан. Халкъ театр­ны коллективини гьара­катына къарап къойсанг да та­манлыкъ эте. Театргъа, бир вакъти бу районну маданият управлениесини начальниги бо­луп ишлеген Ималдин Муцалхановну аты къоюлгъан. Муцалханов – Бабаюртну маданиятын гётерме де, театрны къурма да, ону гьаракатын юрютме де кёп къуллукъ этген адам.

Халкъ театрда ол къурулгъанлы, оьзюню пагьмусун гёрсетгенлени арасында Зумрут Мантиева айрыча эс этиле. Ол – Дагъыстан Республиканы маданиятыны ат къазангъан къуллукъчусу. Театрны коллективи спектакллери булан рес­публикадан тышда да оьзлени пагьмусун гёрсете, гьар тюрлю конкурсларда ортакъчылыкъ эте, савгъатлагъа ес бола.