Дёргелилилени савлу­гъуну гьайын этивде юрт­да иш гёреген участка больницада чалышагъан медицина къуллукъчулар аслам къошумун болдура. Лап гиччи яшлардан тутуп, уллу чагъына етишгенлеге ерли савлугъу тергелеген ва бек­лешдирмекни гьаракаты болдурулагъан шо савлукъ сакълав идарагъа врач-сто­матолог Зайналабит Ба­тыр­мурзаев бажарывлу кюй­де ёлбашчылыкъ эте.

 

Ол Дагъыстан пачалыкъ медицина академияны инг яхшы къыйматлар булан 1996-нчы йылда битдирген сонг ата юртундагъы больницада иш башлагъан. 2005-нчи йылда буса Дёргелини юртбашы этилип сайлангъан. Шондан сонггъу беш йылны узагъында шо жаваплы къуллукъгъа белсенип, ол юртлуларыны гьар гюнлюк авараларын кютювге болушлукъ этип гелген. Шолайлыкъда, юртну да, юртлуларыны да алдында токътагъан масъалаланы кёп яхшы билген ва оланы чечивню ёлларына да тюшюнген. Шо йыл­ларда топлангъан сынав огъар бугюнлерде де табыла.

Юртдагъы участка больницаны бугюнгю гьалын ахтарып сорагъанда, ол магъа билдирегени йимик, умуми кюйде алгъанда, ону ишине 30-гъа ювукъ адам къуршалгъан. Бу савлукъ сакълав идарада чалышагъан медсестралардан къайры да, 2 педиатр, 2 терапевт, акушер-гинеколог аврувланы багъа, татывлукъда гелишип де ишлей. Оланы арасындан айырып бирисин де айтмагъа бажарылмай. Нечик де, терапевтлер Магьаммат Мамаев, Найида Исаева, акушер-гинеколог Майминат Гьажиева, олай да бугюнлерде больницада ишлейген врачланы гьар къайсы да оьзлени ишине берилген, ону яхшы билеген гьаракатчы ва бажарывлу кас­бучулар гьисапда оьзлени танытгъан. Аврувланы больницада ятдырып савлугъун беклешдиргенден къайры да, больницаны амбулатория-поликлиника бёлюгюнде оланы къабул да эте. Юртдагъы участка больницаны баш врачы оьзю де бугюнлерде стоматолог гьи­сапда юртлуларыны тиш аврувларыны къолай этмек учун къаст эте.

Эсгерилген савлукъ сакълав идарада мунда ишлейген врачлардан кёмек гёзлеп гелгенлеге лаборатория бё­люкде башлапгъы тергевлерден оьтмеге, шону булан бирге бир вакътини ичинде он адамгъа ятып оьз­лени савлугъун беклешдирмеге шартлар яратылгъан. Юртда яшайгъанланы санаву 6 мингге етишегенин гьисапгъа алса, шо, озокъда, азлыкъ эте. Шо гьакъда айта туруп, Зайналабит Батырмурзаев да­гъы да:

– Бизин республикада къабул этилген инвестиция программагъа гёре къурулушу та­мамланып, ювукъ вакътини ичинде пайдаланывгъа бериле­жек юртдагъы участка больни­цасыны янгы бинасында да ав­рувлар учун ятмагъа 10 ер тюгюл гёрсетилмеген. Мен гьисап этеген кюйде, бизин больница янгы бинада иш башлагъан сонг, аврувлар оьзлени савлугъун беклешдирмек учун ятагъан ерлени санавун 30-гъа ерли сама артдырма герек эди, – деп эсгере. – Шо гьакъда айтагъанда, Дёргели бизин районну баш юрту гьисапланагъан Къарабудагъгентден лап йыракъда ерлешген юрт экенин гьисапгъа алмагъа тюше. Шо себепден бизин участка больницагъа аврувдан азап чегип турагъан адамны уьстюне чалтлыкъда етишмек учун «скорая помощь» машин гёрсетмекни де тийишли гёремен. Янгыз иш ёлдашларым тюгюл, мени оьзге юртлуларым да шо пикруну якълайгъанына бир де шеклик этмеймен.       

Тек Дёргелидеги участка больницасыны къуллукъчу­ла­ры оьзлени ишиндеги че­­тимликлеге бир де къайпан­майлы, югъагъан ва оьзге ав­­рувланы алдын ал­макъ, олай да сабий чагъындагъы яшланы сав­лугъун тергемек учун яяв юрюп, аб­зар-абзаргъа гирип, сав­лай юртну айланып чыгъалар.

Гьар тюрлю идараларда ишлейген юртагьлюлени савлугъун тергевню токъ­ташдырылгъан болжалларда оьтге­ривге агьамият бериле. Юртдагъы участка больница янгы бинагъа гёчгенде, къаравулланагъан кюйде УЗИ ва рентген алатлар гёрсетилсе, аврувлагъа багъывну сан янын шайлы яхшылашдырмагъа бажарылажакъ деп инамлыкъ да бар. Мен буса дёргелилилеге: «Аврумагъыз, оьрде эсгерилген савлукъ сакълав идарагъа кёмек излеп барагъанланы санаву баргъан сайын аз болсун!» – деп ёрамагъа сюемен.