Наркотиклеге къаршы форум оьтгерилди

Наркотиклеге къаршы форум оьтгерилди

        Дагъыстанда июн айны 23-нден 26-сы болгъунча аралыкъда ­«Айыкъ Россия» деген Бютюнроссия форуму оьтгерилди. Июн айны 24-нде форумну генглешген жыйыны болду. Жы­йынны ишинде «Айыкъ Россия» деген Федерал проектни ёлбашчысы, Россия Федерацияны Жамият палатасыны члени Солтан Гьамзаев, Жагьиллени ишлерине къарайгъан федерал агентликни ёлбашчысы Александр Бугаев, Россия Федерацияны савлукъ сакълав министрини заместители Олег Салагай, ортакъ иш юрютеген министерликлени ва ведомстволаны, оьзге къурумланы ёлбашчылары да ортакъчылыкъ этди.


Форумну ишине гёре «Единая Россия» партияны Генеральный советини Секретары Андрей Турчак, Россияны Президентини Темиркъазыкъ-Кавказ федерал округдагъы толу ихтиярлы вакили Александр Матовников, Наркотиклеге къаршы пачалыкъ комитетни председателини заместители Андрей Храпов, Россия Федерацияны Савлукъ сакълав министерлигини баш нарколог врачы, Россияны наркологларыны Ассоциациясыны президенти Евгения Брюна къутлав телеграммалар да йиберген эди.


Дагъыстан Республиканы Башчысыны ва Гьукуматыны Адми­нистрациясыны ёлбашчысы Владимир Иванов респуб­ликаны Башчысыны атындан форумгъа жыйылгъанланы къаршылады ва булай чараланы оьтгериливюню бек уллу маънасы бар экенин эсгерди. Владимир Иванов айрыча эсгерген кюйде, бу масъаланы чечиливюне гёре бары да этилме тийишли ишлер яшавгъа чыгъарылажакъ.


Россия Федерацияны савлукъ сакълав министрини заместители Олег Салагай жыйылгъанлагъа билдирген кюйде, алдагъы йылларда, айры регионларда наркотиклер къоллавгъа къаршы юрюлеген ишлер бир кюйде салынмагъан. Булай форумланы вакътисинде шо гьаракатны камиллешдирме ва гючлендирме бола.


Жагьиллени ишлерине къарайгъан федерал агентликни ёлбашчысы Александр Бугаев берген баянлыкъгъа гёре, Россия Федерацияны бир-бир регионларында наркотиклер къоллав булан байлавлу гьал бек бузукъ деп айтса да ярай. Бу социал аврувну янгыз докторлар гёрсетеген ёллар булан тюгюл, тарбиялав ёллар булан да чечме тарыкъ.


РФ-ни Жамият палатасыны члени, «Айыкъ Россия» деген федерал проектни ёлбашчысы Солтан Гьамзаев де оьзюню сёйлевюнде далиллер булан наркотиклер къолла­йгъанланы жамият учунгъу заралыны гьакъында эсгерди. Ол англатгъан кюйде, Темиркъазыкъ Кавказда 10 йыл алда аптеклерде наркотикни сатып алма бажарыла десе инанма да къыйын болгъан. Шону учун да аптеклерде наркотиклени сатылагъанын токътатма тарыкъ.


Форумну генглешген жы­йынында вице-премьер, ДР-ни билим берив ва илму министри Уммупазил Омарова, ДР-ни Гьукуматыны Председателини заместители Рамазан Жафаров ва оьзгелер де ортакъчылыкъ этди.