Муслим Элдарханов – Уллу Ватан давну ортакъчысы. Дав йылларда 32-нчи Смоленский атлы асгер дивизияны эскадронуну командири болуп къуллукъ этген.

1943-нчю йылны ноябр айыны 19-нда ол яраланып, госпитальгъа тюше. Авур яралардан къолай болгъан сонг, сакъатлыгъы саялы, асгер къуллукъдан азат этиле. 1944-нчю йылны язбаш айларында ата юрту Оьтемишге къайта.

 

Юртдагъы уллу орамланы бирисине ону аты къоюлгъан.

Муслим Элдархановну авлетини авлети Магьаммат Элдархановну юртлулары ата юртуну бугюнюне де, гележегине де жаны авруйгъан уланлардан бириси деп таныйлар. Ол Къаягент районну налог инспекциясына ёлбашчылыкъ эте. Биз юртгъа гелген гюн къаршылагъанланы арасында да ол бар эди.

– Жыйыламы дагъы налоглар районда сиз рази къалардай? – деп сорайман Магьамматгъа. Ол англатгъан кюйде, налог жыйыв къуллукъну асувлугъу артдагъы йылларда бир нече керенге артгъан. Кюйге къарагъанда, совет заманда къазанч ишлер булан машгъул болмагъан ва алгъан хайырына гёре налоглар да тёлеп уьйренмеген халкъ гьали астаракъ шогъар уьйрене тура. Олар намусуна гёре тийишли налогланы тёлесе, Оьтемиш йимик юртлагъа да харж маялар булан таъмин болмагъа элтеген ёлланы бирлери сама ачылажакъ.