Шихсайит мени эркъардашым болгъангъа буса да ярай, мен ону ич дюньясыны тазалыгъын, айрыча англап, гьис эте эдим. Ол оьзюнде адамлыкъны сакълап да, айланасындагъылагъа да шо хасиятны гёрсетип де биле эди. Ол бир заманда да бирев булан да, бир къардашы булан да эришип, яман сёзлени оьзю де айтмагъан, оьзюне де айтдыртмагъан. Неге тюгюл, ол адамлыкъдан эниш тюшюп, бир де сёйлемей эди.

Мени эркъардашым Шихсайитден мен де кёп таза къылыкълагъа уьйрендим. Биринчилей мен ондан яманлыкъ этген адамдан гечмеге уьйрендим. Буссагьатда да менде, ол сав заманда, ону ич дюньясыны байлыгъындан алгъан дагьним кемимеген.

Шихсайит гьар тюрлю адам булан ону оьзюню тилинде сёйлеп биле эди. Гиччи булан – гиччи кюйде, уллу тамазалар булан – уллу болуп, чиновниклер булан оланы оьзлени тилинде, къойчулар, савунчулар, ишчилер булан оланы тилинде сёйлей эди.

Гиччиден берли бизин аралыкъда иссилик, бир-биревню англайгъанлыкъ бар эди. Менден гиччи къызардашларымны ол бираз шашытса да, мени хатирим къалмай эди. Ол мени булан къурдашы йимик сёйлеп биле эди. Ата-анабыз булан Шихсайит бек ювукъ эди. Ону гьакъыллылыгъы, сабурлугъу мени гьали де ол оьр даражадагъы адам болгъанына инандыра.

 

Р. ЖАМБОЛАТОВА,

Дагъыстан Республиканы пачалыкъ

 идараларыны ат къазангъан къуллукъчусу.

 

 

 

«Яшамагъа

алгъасай эди»

 

Оьлюм гьар заман хапарсыздан геле. Адам нечакъы яшаса да, дагъы да кёп яшап болар эди деген ой геле. Шо ой  яшавдан тез гетген адамны гьакъында гелсе, дагъы да бек таъсирли бола.

Шихсайит Исаевич заманны асырап-къоллап бажара эди. Дюньядан тез гетегенин билегендей, ол яшамагъа алгъасай эди. Бир гюнню де зая этмей, оьз ишине багъышлай эди. Заманы нечакъы аз болса да, ол оьзюне кёмек излеп гелген адам булан гьаллашма, ону къыйынына тынглап англамагъа заман таба эди. Айрокъда ону янына жагьил адамлар кёп геле эди.

Шихсайит Исаевични рагьмулу ишлери, ону гишиге яхшылыкъ этмек деген муратгъа къуллукъ этегени болгъандыр деп эсиме геле.

Шихсайит Исаевич «Совет Дагъыстан» деген журналны къурдашы эди. Мен о журналны баш редактору болуп ишлегениме гёре билемен, ол  журналист къуллукъгъа бек агьамият бере эди.

 

 

М. БУТАЕВ,

тарихи илмуланы доктору, профессор.

 

 

 

 

Тарихден тайдырма болмас

 

Шихсайит Исаевич Дагъыстандан тышдагъы оьлчевден алгъанда да бек уллу политик ва партия къуллукъчу эди. Ол оьзюню бажарывлугъу, англавлугъу, итти гьакъылы булан савлай пачалыкъ оьлчевдеги адам эди.

Ол суткада 22 сагьат ишлеп, эки сагьат юхлай болгъандыр деп эсиме геле. Тек ону бир заманда да ругьдан тюшюп гёрмегенмен.

Шихсайит Исаевични инг де арив къылыгъы, ону къурдашлыкъны сакълап билегенлик эди. Ол адамны оьзюне тартып, сёзюне инандырып да бажара эди.

ВЛКСМ-ни обкомуну секретары болуп ишлейгенде, айрокъда жагьиллени бек гьайын этегени гёрюндю. Оьр партия къуллукълагъа чыкъгъанда, ол жагьиллени гьайын этегени булан бирче, олагъа ёл гёрсетивчю хасиятны да оьз къалибинден тайдырмай сакълама болду.

 

 

А.АЛИЕВ,

Уллу Ватан давну ветераны.