Оьтген жумада Къаягент райондан хас асгер гьаракатны ортакъчыларына гезикли рагьмулу кёмек этилди. Шону гьазирлевде Дагъыстанны Халкъ Жыйыныны депутаты Къурбан Гьабибов, Первомайское юртну башчысы Муса Къурбанов ва юртлулар болагъан къошумун этдилер.
Асгер борчун кютеген яшлагъа тарыкълы маллар, эки машинге юкленген ашамлыкъ, исси опуракълар, дарманлар ва яшлар язгъан кагъызлар асгерчилеге етишме герек. Юкден толгъан бир «УАЗ» маркалы машинни депутат Къурбан Гьабибов оьзюню харжына алгъан. Шо машинни ол Къаягент бойдан гетген асгерчилеге савгъат этегенин де билдирген.
Къаягент районну башчысы Магьаммат Элдерханов кёмек этгенлеге гьакъ юрекден баракалла билдирди ва асгерчилер оьзлени унутмайгъанны, тергев этегенни бек ушатажакъны да айтды.
–Бизден алынгъан гьар мал, кагъыз яда посылка, олар борчун намуслу кюйде кютегенге разилик билдирегенни ва уьстюнлюк булан къайтажагъын къаравуллайгъанын англатажакъ, – деп де къошду.
