Буйнакск районну инг де гёзел еринде, яшыллыкъны ичинде ата юртум Ишарты ерлешген. Бугюн мен ону аривлюгю гьакъында лакъыр юрютмеймен. Уллу Ватан давну къызгъын ябушувларына тюшюп, азиз жанларын аямай, къоччакъ кюйде душмангъа къаршы ябушгъан юртлуларымны бирдагъы керен эсге аламан.

Увучгъа сыяр чакъы гиччирек юртум Ишартыдан давгъа 116 адам гетген. Тек оланы 27-вюне тюгюл аявлу ожакъларына къайтма насип иржаймагъан. Биринден-бири эревюллю 89 эркек давну оьртенинде кюлге айланып, нечакъы ожакъгъа къара къайгъы къопдургъан.

Эки яда уьч уланын ёлгъа салып, олар гёрюнмейген болгъанча артындан улуй, бозара къалгъан аналар да, ожакълар да бар. Мисал учун, уллатам Умар, ону иниси Салигь Умаровлар анасы Пахуну къарнын-гёнгюн чюйре айландырды, ичин гюйдюрдю. Умарны эливлери къайда къалгъанны гьалиге ерли бир илли-инсан билмей.

Сонг да, улланам Илмуханым уьч эркъардашы – Алимсолтан, Бийсолтан, Дадам Ациевлер, агьлюсю Иса Гьайбуллаев къайтар бугъай деп телмирип, сарнай туруп яшавдан гетди. Алимсолтан 16 йыллыгъындан гёнгюллю кюйде биревге де къарамай фронтгъа гетген. Уьч де агъа-инини бирисини гьакъында давну ветераны Илларион Фёдорович Евдокимов язып «Дагестанская правда» газетде 1969-нчу йыл Дазу сакълавчуланы гюнюне «Снайпер Ациев» деп чыкъгъан макъала бар. Шонда ол айтагъан кюйде, Ациев Киев бойларда пограничный отрядда снайпер болгъан. Бир гюн 10 немис солдатны ва офицерлени къыргъан. Шо игитлиги учун ону «Къызыл Байракъ» орденге гёрсетген болгъанлар. Тек ону къолуна тюшмеген, о заманлар дос-къардашын ахтарып айлангъанлар. Ону гьакъында белгисиз къалып тура.

Олай да, юртгъа къайтып гелгенлени арасында кёп заман ветеранларыбызны советини председатели болуп тургъан Наурбий Шамиловну тёшюн эки «Къызыл Юлдуз» орден безей эди. Сонг да, Хайрулла Дагьировну да эки Макътавлукъну ордени бар эди. Душмандан бюдюремей къоччакълыкъ гёрсетген Ишарты юртлуларыма минг макътавлар болсун!