Гетген жумада Хумторкъали район администрациясында жыйынланы оьтгеривню чараларын гёрювге байлавлу «дёгерек стол» оьтгерилди. Районда болгъан «дёгерек столда» Дагъыстанны милли политикагъа ва дин ишлеге  къарайгъан министрини заместители Расул Гьажиев, республиканы тамазаларыны советини председатели Ибрагьим Ибрагьимов, районну юртларыны башчылары, межитлени имамлары ва жамият чалышывчулар лакъырлашывда ортакъчылыкъ этди.

 

Расул Гьажиев «Уьйташ» аэропортда  болгъан низамсыз ишлени мисалында тувулунгъан гьалны анализ эте туруп, оьзюню ойларын айтды. Ол Украинаны территориясындан туруп тувулунгъан гьалны бирден-бир оьрчюкдюреген къайдалары гьакъда да хабарлады.

«Яшыны гележеги учун гьар заман да ата-аналаны уьстюнде уллу жаваплыкъ бар. Тек тарбиялав яшавну кюрчюсюнде  къурулма герек, шо саялы да яшланы тарбиялавда бизден жаваплыкъны тайдырмайбыз. Межит-лени имамлары насигьатланы вакътисинде ят агитаторлар тувулунгъан гьал булан оьз­лени пайдасына гьаракат юрютмесин учун яшланы соравларына англашылагъан кюйде жаваплар беребиз, – деди Хумторкъали районну жума межитини имамы Садрутдин-гьажи Къазаватов.

Ибрагьим Ибрагьимов оьзюню янындан хумторкъалилеге тарбиялав ишни яхшы юрютегени учун рази­лигин билдирди ва ерлерде англатыв ишни бирден-бир жанландырмакъны ва гючлендирмекни тиледи. «Ерлердеги гьалны юртда яшайгъанлар, юртланы башчылары, межитлени имамлары, жамият активистлер йимик бирев де яхшы билмей», –деди И. Ибрагьимов.

 

Жават ЗАКАВОВ.

СУРАТДА: «Дёгерек  столну» айланасында пикру алышдырыв.