Артдагъы вакътиде Бабаюрт районда юртлу халкъыны яшав гьалларын яхшылашдырывгъа бакъдырылгъан «Мени Дагъыстаным – онгайлы шагьар шартлар» деген программаны яшавгъа чыгъармакъ муратда хыйлы ишлер этилип тура. Шо программагъа гёре бу йыл районну Люксембург, Хамаматюрт, Герменчик ва Гьасанай юртларында да ял алыв бавлар ачмагъа гёз алгъа тутулгъан.

Район администрацияны ЖКХ-гъа ва уллу къурулушланы ишлерине къарайгъан бёлюгюню ёлбашчысы Артур Мингалиев берген маълуматлагъа гёре, шо объектлер адамны савлугъуна зарал гелтирмейген материаллардан этилип тура ва шоларда гьалиги архитектура къалипдеги яшлагъа оюнлар учун ерлер гёрсетилген. Ял алыв бавларда яшлар булан бирге уллулар да оьзлени бош заманын шатлыкъда оьтгермек учун бары да имканлыкълар яратылажакъ деп къаравуллана.

Артур Мингалиевни сёзлерине гёре, районну ёлбашчысы Даниял Исламов гьатта район центрдан арекде ерлешген юртлардагъы халкъны яшавун яхшылашдырмакъ муратда да къасткъылып айлана. Шо чараланы барышында районну юртларында янгы ял алыв бавлар, спорт майданлар къурула, ёллар онгарыла ва жамият учун пайдалы оьзге ишлер яшавгъа чыгъарыла.

Герейхан ГЬАЖИЕВ,

оьз мухбирибиз.