Украинада юрюлюп турагъан хас асгер операциясында ортакъчылыкъ этеген бизин Бабаюрт районлу Алимир Салиев, 2022-нчи йылны май айыны 9-нда Россия Федерацияны Президенти Владимир Путинни Указы булан гёрсетген игитлиги саялы Къоччакълыкъны ордени» булан савгъатлангъан.
Донецск ва Луганск республикаларда башлангъан хас асгер операцияда биринчи гюнден тутуп ортакъчылыкъ этеген Алимир Донбассны халкъын украинли миллетчилерден тазалавда командованиени буйрукъларын инамлы кюйде кютген. Ол разведгруппасы булан кёп маълуматланы билеген айтылгъан миллетчини къолгъа алагьан.
Оьзлер токътагъан ерге къайтып гелеген вакътиде украинли миллетчилер оланы алдын къыркъа. Амма разведчиклер адамай, оьзлерден 3 керенге артыкъ гючю булангъы душман булан бетге-бет ябушалар. Юрюлген дав урушну барышында разведчиклер оланы 25-вюн ёкъ эте, къалгъанлары башын алып къачалар. Буса да шо урушда разведчиклер де яраланалар. Шо вакътиде Алимир душманлар къоюп къачгъан машинни ягъып ишлетип, шогъар яралангъан ёлдашларын да миндирип, оланы дав майдандан чыгъармагъа ва Белгород шагьарда ерлешген госпитальгъа етишдирмеге болагьам.
Алимирни гьакъында айта туруп, ону яшав ёлун да эсгермеге сюебиз. А. Салиев 1995-нчи йыл 11-нчи августда Геметёбе юртунда муаллимлени агьлюсюнде тувгъан. 1999-нчу йыл ата-анасы ишлеп къазанмакъ учун Тюмень областны Ханты-Мансийск автоном округуна, Юграгъа гёчелер. Ата — анасы юрт школада загьмат ёлун давам эте, Алимирни буса яшлар бавуна онгаралар.
Онда 3 йыл ишлеген сонг, уьягьлю Белоярск шагьаргъа гёчелер, агъа — инилер буса 3 номерли шагьар школада охуйлар. Онда охуйгъан вакътисинде Алимир енгил атлетика булан машгъул бола ва шагьар оьлчевюнде оьтгерилген спорт ярышларда биринчи ерлени къазана. Ата юртуна юреги тартып, Салиевлени агьлюсю 2009- нчу йыл Дагъыстангъа къайта. Алимир де охувун Геметёбедеги орта школада давам эте ва Дагъыстан Пачалыкъ университетни юристлени гьазирлейген бёлюгюне тюше. Охувну заманында ол оьр охув ожакъны яшавунда актив кюйде ортакъчылыкъ этегени, яхшы охуйгъаны саялы деканатны янындан бир-нече керенлер грамоталар ва дипломлар булан савгъатлана.
Университетни тамамлап, А. Салиев юрист касбугъа ес бола ва Ленинград областда асгер борчун кюте. Асгер борчун кютюп къайтгъан сонг Алимирни Россияны Ахтарыв Комитетинде ишлемеге умуту бола ва шо умутун яшавгъа чыгъармакъ учун Москвагъа гете, тек тувулунгъан гьаллагъа гёре, Алимир дыгъар язып, Россияны асгер полициясында борчун узата.
Къоркъув билмейген къоччакъ воин Алимир Салиев бугюнлерде де элибизде парахатлыкъны болдурувда оьзюню алдына салынгъан борчланы намуслу кюйде кюте.
Алимирни къоркъув билмейгенлиги ва Ватанына аминлиги оьсюп гелеген яш наслугъа уьлгю болуп токътажакъгъа шеклик этмейбиз ва огъар уьстюнлюклюклер ёрайбыз.
