Хумторкъали районда «Зарница» деген дав-патриот оюн оьтгерилген

18 марта 2021 в 22:11 74
Бугюн Хумторкъали районну Алмалы юртундагъы орта школада асгерге чакъырылма герек яшёрюмлени арасында, Уллу Уьстюнлюкню 76 йыллыгъына багъышланып, «Зарница» деген дав-патриот оюн оьтгерилген.

Оюнлар район администрацияны маданиятны, яшёрюмлени сиясатына къарайгъан ва билим берив Управлениелерини сиптечилиги булан юрюлген ва онда районну бары да юртларындан гелген командалар ортакъчылыкъ этгенлер.

Оюнланы гьасиллерине гёре, 1-нчи ерни Учкент команда алгъан. 2-нчи ва 3-нчю ерлеге Тумиркъуюну ва Тёбени яшёрюмлери ес болгъанлар. Оюнларда савгъатлы ерлени алгъан командалар медаллар ва грамоталар булан савгъатлангъан, алдынлы ерни алгъан Учкентни командасы буса республика оьлчевде оьтгерилежек оюнларда ортакъчылыкъ этежек.

Оюнланы гьасиллерин чыгъара туруп, районну Яшёрюмлерини советини ёлбашчысы Жалалутдин Закарьев «Зарница» деген дав-патриот оюн яшёрюмлеге оьзлени гючюн ва команда булангъы аралыгъын беклешдирмеге имканлыкъ берегенни эсгерген.

«Зарница» яшёрюмлеге янгыз асгерлик борчун кютеген вакътиде тюгюл, оланы савлай яшавуна да пайдалы болажакъгъа шекли ёкъ», -- деген Жалалутдин Закарьев.