Бабаюртда авур атлетикадан ярышлар оьтгерилген

24 февраля 2021 в 21:52 97
Бабаюртда авур атлетикадан яшёрюмлени арасында Дагъыстанны Алдынлыгъы учун ярышлар оьтгерилген. Ярышларда Дагъыстанны районларындан ва шагьарларындан гелген 80-ден де артыкъ яш авур атлетлер ортакъчылыкъ этгенлер.

Бизге билдирген кюйде, ярышлар Дагъыстанны спортгъа къарайгъан министрилигини сиптечилиги ва Бабаюрт район администрацияны гьакаракатлыгъы булан оьтгерилген. Ярышланы ачылывунда Дагъыстанны авур атлетика Федерациясыны президенти Сайид Абдуллаев, бу йыл авур атлетикадан Россияны Кубогуна ес болгъан Исмаил Гьажибеков, Бабаюрт районну ёлбашчысыны орунбасары Ильмидин Абдуразакъов ортакъчылыкъ этгенлер.

Ярышлар гючлю тогъа тартывда оьтген. Утдурма бирев де сюйген, шо саялы да ярышлар къаравчуланы кепине гелердей давамлангъан.Гьакъыкъатда Дагъыстанны яшёрюмлерини арасында лап да гючлю авур атлетлер белгили болгъанлар.

Ярышланы ахырында алдынлы ерлени алгъалагъа медаллар, кубоклар, гьюрметлев грамоталар ва эсделик савгъатлар тапшурулгъан.

Билдирилген кюйде, ярышлар ДАССР къурулгъанлы 100 йыл битегенликге ва Ватанны якълавчусуну гюнюне байлавлу болгъан.