Юрт ерлерде клубланы агьамиятын ва пайдасын биз яхшы англайбыз. Алдын клублагъа кёплер барып, толу кюйде ял да ала эди. Кинолагъа, концертлеге къарап, гёнгюн ача эди. Совет девюрден сонг, чёрекни гьайын этип, адамлар жан талашывда. Маданият ожакълагъа барагъанланы санаву аз болду. Кёп ерлерде клублар бузулду, бирлерини биналарындан кюрчюсю де къалмады.
Бу якъдан алгъанда Мужукъай юрт тюзелген деп айтмагъа болабыз.
Шо юрт Бабаюрт райондагъы оьзге юртлардан гиччи болса да, маданият ожакъны – клубну бинасы сакълангъан.
Мужукъай юртдагъы клубну ёлбашчысы Юлдузат Исаева бажарывлу, ишине юреги авруйгъан маданият къуллукъчу гьисапда бугюнлерде де маданият ожакъны очагъыны отун сёнме къоймай сакълагъан. Шо гьакъда айтгъанда, Юлдузат Исаева – маданият тармакъгъа оьзтёрече ёл булан гелген гьайлы касбучу. Ол аз заманны ичинде юрютеген касбусуна берилгенлиги ва жаваплыгъы булан иш ёлдашларыны, юртлуларыны разилигин ва баракалласын алып бажаргъан.
Ол Бабаюртда Бадурдин ва Калимат Абдуразакъовланы кёп яшлы агьлюсюнде 1971 – нчи йылда тувгъан. Эл арада оьзлени къайратлы загьматы булан уьлгюге лайыкълы Абдуразакъовланы берекетли ожагъында оьсген Юлдузат гиччиден билимлеге муштарлы болгъан. Ол Бабаюртдагъы 1 номерли школаны битдирип, Аштархан шагьардагъы технология техникумгъа охума тюшген. 1991-нчи йылда охув ожакъны яхшы къыйматлар булан битдирип, ата юртуна къайта. Амма ес болгъан касбусуна гёре ишлемеге чола болмагъан. 1992 -нчи йылда къысмат буюруп, мужукъайлы улан Байрамали Исаев булан уьйленип, янгы ожакъ къургъан.
Юлдузат ким де сукъланардай тизив ожакъ тутгъан, яннавурундагъы агьлюсюню инамлы ёлдашы ва сырдашы бола. Агьлюде 3 авлет тува.
Агьлю шартлагъа гёре, Юлдузат кёп заман ишлемеге чола тапмай. Уьйде, ожакъда иссиликни ва берекетни болдуруп турса да, Юлдузат юртну жамият яшавунда ортакъчылыкъ эте болгъан. Ол гьар гезик де сайлавланы вакътисинде сайлав комиссиягъа къуршалып, халкъ арада англатыв иш юрютген. Тарыкъ болгъан гезиклерде клубда юрюлеген гьар тюрлю гьаракатлагъа да оьзюню къошумун болдургъан. Шону гёз алгъа тутуп, шо замангъы клубну директору Румия Агьматова ишинден таягъанда, оьзюню орнуна клубну башын тутмагъа Юлдузат Исаеваны таклиф этген.
Шолайлыкъда, 2014-нчю йылдан тутуп, Юлдузат Исаева Мужукъай юртдагъы клубну директору болуп белсенип чалыша. Ишинден айрылмагъан кюйде Юлдузат касбусуна гёре Магьачкъала шагьардагъы СССР-ни халкъ артисткасы Барият Муратованы атындагъы маданият коллежни охуп битдирген. Билимлеге муштарлы Юлдузат 2020 — нчы йылда юрт хозяйство академияны да битдирип, оьр билимге ес болгъан.
Ол шартлар ва имканлыкълар яратгъанына гёре юрт клубда гьар тюрлю чаралар юрюле. Байрам гюнлени къурумлу кюйде къаршылап, халкъны гёнгюн алма къасткъыла. Школада охуйгъан яшланы да къуршап, эсде къалардай жыйынлар оьтгере.
Яй айларда юртгъа Бабаюртдагъы Ималдин Муцалхановну атындагъы халкъ театрны артистлерин чакъыра. Олар гелип, оьзлер сагьнада яратгъан спектакллени гёрсетеген гезиклер де бола. Юлдузат Исаева шаирлени, язывчуланы юбилейлерине багъышлап эсде къалардай жыйынлар, ёлугъувлар оьтгермеге де къаст эте. Шо гьакъда айта туруп, 2020-нчы йылда къумукъланы машгъур шаири Йырчы Къазакъны 190 йыллыгъына багъышлангъан чаралагъа Юлдузат шаирни суратын этдирген. Бугюнлерде де Йырчы Къазакъны сураты ону кабинетини оьр тамын безей.
Юлдузат ишинде бугюнлерде Украина бойда хас асгер гьаракатда ортакъчылыкъ этеген юртлу уланланы да унутмагъан. Оланы суратларындан стенд этген. Оланы агьлюлери булан тыгъыс кюйде байлавлукъ тута.
– Юлдузат Исаева бажарывлу, касбучу гьисапда пагьмусу ва гьаракаты булан ким де сукъланардай ишлеп тура. Ол къайсы ишни де яшавгъа чыгъармагъа урунса да, тетиксиз, мекенли кюйде оьр даражада оьтгерме сюе, – дей ону гьакъында Бабаюртдагъы « Тангчолпан» деген маданият центрны методисти Ажай Гьажимуратова.
Юлдузатны сёзлери ишлери булан бирче юрюй. Ол – жаныкъаны булан ишине берилген маданият къуллукъчу. Гьар юртда маданият ожакъланы башын Юлдузат Исаева йимик рагьмулу, пагьмулу, жаваплы ва гьаракатчы ёлбашчы тутса, юртну маданият яшаву тюзелген деп айтмагъа болабыз.
Юлдузат районда оьтгерилеген конкурсларда, фестивалларда жанлы кюйде ортакъчылыкъ эте. Ону гьаракаты да жавапсыз къалмагъан. Ол нече керен де гьюрметлев грамоталагъа ва дипломлагъа ес болгъан.
– Мен ишимни кёп сюемен. Гьар адам оьзюню бойнуна алгъан борчларын мекенли кютмесе, ишге къуршалмагъа да тюшмей деп санайман. Менден гетсин, есине етмесин деп ишлейгенлени англамайман ва англамагъа да сюймеймен. Клубланы ярыкълары сёнмесин учун, ону ишин жанландырма герек. Бизин клуб юртлуланы бирикдиреген ва сыкълашдырагъан ожакъ болгъанны сюемен. Клубда милли бийивлеге уьйретеген кружок иш гёре эди. Кружокну юрютеген хореограф ишден гетген сонг, кружокну япмагъа борчлу болдукъ. Гьали ону орнуна касбучу излейбиз. Милли бийивлерден таба милли адатланы ва мердешлени яшёрюмлени арасында генг кюйде яймагъа умутлуман,– дей Юлдузат Исаева.
Юрт ерлерде яшайгъанлар бир-бирин яхшы таный, оланы яшаву-турушу къолуну аясында йимик ачыкъ гёрюне. Юртлулар гьар адамгъа тюз кюйде багьа берип де бола.
– Юлдузат бары да адамгъа бир йимик янашагъан илиякълы тиштайпа. Ону юзюнден бир де иржайыв таймай. Олай ачыкъ адамлар макънатис йимик оьзюне тарта. Юлдузатны ишине къарап, адам оьзюню еринде деп айтмагъа болабыз, – дей юртлусу Аминат Жамаева да.
Юлдузат юртну, элни, халкъны баракалласын ва абурун къазангъан. Ол яшавда ёлугъагъан къыйынлыкълагъа чул бермей, ругьдан тюшмей яшав ёлун узата. Айтагъаным, 2018 -нчи йылда яман аврув къабунуп, кёп сюеген агьлюсю Байрамали хапарсыздан яшавдан гетген. Атасыз къалгъан уьч авлетни Юлдузат оьсдюрюп, олагъа гьайлы ана да болгъан, тарыкълы ерде ата да болма бажаргъан. Уллу уланы Юсуп – бугюнлерде анасыны аркъа таяву. Ол атасы йимик, юрт хозяйство тармакъда чалыша. Уьйленген, эки уланны атасы. Къызы Камилла муаллим касбугъа ес болуп, Бабаюртдагъы школа-интернатда яшлагъа билим бере. Агьлюсю булан бир къызъяшны оьсдюре. Юлдузатны лап да гиччи уланы Иса школагъа юрюй. Ол бугюнлерде 9-нчу класда билим ала.
Юлдузат да яшларындан, торунларындан сююнюп яшай. Гележекде де огъар ишинде оьрлюклер ва уьстюнлюклер ёрайбыз. Маданият ожакъланы очагъыны отун сёндюрме къоймайгъанлагъа минг макътав болсун!
Бэлла ГЬАЖИГЕЛДИЕВА,
Россияны журналистлерини
союзуну члени.
