Гетип барагъан 2023-нчю йыл Къаягент районлулар учун енгил йыл болмады. Алгъа тутулгъан уллу экономика ва социал масалаланы яшавгъа чыгъарыв гьаракатгъа къошулуп, районну загьматчылары иш уьстде гёрмекли натижалагъа етишмеге бажардылар.
Юрт хозяйство – Къаягент районда аслу тармакъ. Шону гьисапгъа алып, федерал, республика гьукуматлары тармакъны оьсдюрювге байлавлу масъалаланы гьар йыл генглешдире. Районну юзюмчюлери, авлакъчылары, гьайванчылары 2023-нчю йылда авлакъларда мол тюшюм оьсдюрмеге бажардылар. Шо гьакъда айта туруп, алдынлы хозяйстволар «Каспий», «Кировский», «Къаягент» деген пачалыкъ унитар пред-приятиелени уьстюнлюклерин айрыча эсгеремен.
2023-нчю йылда районда социал-политика масалаланы чечивге де айрыча агьамият берилип турду. Къаягентде 250 яшгъа яшлар баву ачылды, «Дружбадагъы» яшлар бавунда уллу ремонт этилди, ял алагъанлар учун райондагъы муниципал пляж яхшы онгарылды.
Бизин врачларыбыз, муаллимлерибиз, спортчуларыбыз гьариси оьзлени загьмат чалышывунда яхшы натижалагъа етишмеге бажардылар. Оланы яхшы натижалары гьар районлуну къувандырды.
Сав йылны узагъында биз Украина бойда юрюлеген хас асгер гьаракатны гьалына тергев бакъдырдыкъ, оланы ортакъчылары булан бир нече гезиклер ёлукъдукъ, болагъан кёмегибизни этдик.
Етишип гелеген янгы 2024-нчю йыл уллу ишлени йылы болажакъ. Районну экономикасын оьсдюрювге, социал масалаланы чалт ва сан яны булан яшавгъа чыгъарывгъа тийишли тергев берилежек. Районну топуракъларын, денгиз бойда ял алмагъа гелегенлер учун яхшы шартлар къурмагъа бек агьамият берилежек.
Федерал гьакимлерини айтывларына гёре, денгиз бойда 10-12 минг адам яшамагъа болажакъ янгы курорт шагьарны къурув гёз алгъа тутулгъан. Яхшы ишлер дагъы да бар.
Аявлу охувчулар, районну ва республиканы халкълары, етишип гелеген янгы 2024-нчю йылда барыгъызгъа да савлукъ, узакъ оьмюр, иш уьстде уьстюнлюклер, агьлюлеригизге берекет ёрайман.
