Янгы йылгъы къутлав: Даниял ИСЛАМОВ, Бабаюрт районну башчысы. Даниял ИСЛАМОВ, Бабаюрт районну башчысы.

2023-нчю йыл бизин гьарибизге гьар тюрлю янгылыкълар алып гелди: ёлугъувлар, сююнчлер ва талчыкълар. Оьтген йыл гелтирген четимликлени арты къысгъа болажакъгъа, янгы етишип гелген 2024-нчю йыл бизге сююнч, татывлукъ, бирлик ва парахатлыкъ гелтирежекге инанмагъа сюемен.

Бу ерде мен ёлбашчылыкъ этеген Бабаюрт районну ватандашларыны гьарисине магъа инанагъаны ва районну ичинде юрюлеген гьар ишде жагь кюйде ортакъчылыкъ этегени учун гьакъ юрекден баракалламны билдирмеге сюемен. Неге тюгюл де, не ишде болса да, янгыз  бирлик бизин алгъа элтмеге болажакъ.

Оьтген 2023-нчю йылда биз хыйлы ишлер этмеге болдукъ. Шоланы арасында айрыча районну 2 школасы толу кюйде ярашдырылгъанны, Мужукъайны, Тамазатёбени, Геметёбени, Хамаматюртну, Адил-Янгыюртну ва Бабаюртну орамларына асфальт тутулгъанны эсгерсем де таманлыкъ эте. Шо юртларда яшайгъан халкъ шо ишлени яшавгъа чыгъывун узакъ йылланы боюнда гёзлеген эди. Бу йыл юртлуланы шо умуту да яшавгъа чыкъды.

Умуми кюйде алгъанда, бу йыл районну юртларында 8 чакъырым ёллагъа асфальт тутулду, 1 номерли Львовский юртда янгы школа, Хамаматюртда яшлар баву, Тотаюртда, Геметёбеде, Туршунайда, Янгы Хасада ва Адиль-Янгыюртда гиччи топ оюн, Бабаюртда буса уллу топ оюн майдан, къурулду. Халкъны яшавун бираз сама да енгил этмеге имканлыкълар яратылды.

Озокъда, этмеге герек ишлер дагъы да кёп бар. Янгы етишип гелген 2024-нчю йылда да шо ишлени узатмагъа умутлубуз.

Янгы 2024-нчю йыл барыгъызгъа да савлукъ, сююнч ва парахатлыкъ алып гелсин! Етишип гелген янгы йыл моллукъну ва татывлукъну йылы болсун!

Авторизация
*
*
Регистрация
*
*
*
Согласны с условиями сайта?
Генерация пароля