Шагьбан ай

Бу йыл Шагьбан айны биринчи гюню февральны 11-не, къаттыгюнге рас гелди

Шагьбан айда этилеген яхшы ишлер учунгъу зувап 700 керен арта ва кёкге бир де къаршылыкъ болмагъан кюйде гётериле. Шо саялы Аллагьны ахырынчы Элчиси сав айны боюнда ораза тута болгъан. Бир гезик  Магьаммат Пайхаммар (алайгьисалам): «Ражап ва Рамазан айланы ортасында ерлешген бу айгъа адамлар гьайсыз янаша. Бу айда этилеген бары да ишлер Аллагьгъа гётериле. Шо ишлерим гётерилегенде мен ораза тутгъан гьалымда болагъа­нымны сюер эдим», – деген сёзлери бизге етишген. Сав айны узагъында болмайгъан адамгъа башында, ортасында, ахырында уьчер гюн ораза тутса яхшы. Шагьбан айны 15-нде тутулгъан ораза айрокъда сыйлы гьисаплана. Магьаммат Пайхаммарны (алайгьисалам) гьадисин­де шо гьакъда булай айтыла: «Шагьбан айны ба­шында, ортасында ва ахырында уьчер гюн ораза тутгъан гишиге Яратгъаныбыз етмиш пайхаммарны шабагьатын язажакъ ва ону даражасы етмиш йыл ибадат этген къулнуки йимик артдырылажакъ. Шо ай оьлсе, ол шагьит болуп оьлежек». Шагьбан айны биринчи ва ахырынчы хамисгюнлеринде де ораза тутмагъа яхшы санала. Сыйлы гьадислени бирисинде шо гьакъда да айтыла: «Шагьбан айда биринчи ва ахырынчы  хамисгюнлеринде ораза тутгъан гишини Яратгъаныбыз Аллагь женнетге гийирежек болгъан». Башгъа сыйлы гьадисде де булай айтыла: «Шагьбан ай от-ялындан къоруй. Мени булан ёлукъма сюегенлер бу айда уьч гюн сама ораза тутсун». Шондан сонг да, шо айны узагъында «Аллагьума салли ала Мугьаммадин ва ала Мугьаммадин васаллим», – деп салаватны кёп салмагъа да тюше.

Насрулла БАЙБОЛАТОВ.

 

Авторизация
*
*
Регистрация
*
*
*
Согласны с условиями сайта?
Генерация пароля