Къолъязмалы Къуран Паравулда малим этилди

Алдагъы гюнлерде Къарабудагъгент районну Паравул юртундагъы  мадрасада Сулеймен-гьажи Аширлаевни къолъязмалы Къуран китабын юртлулагъа, олай да бизин республиканы шагьарларындан ва оьзге  районларындан гелгенлеге малим этивге байлавлу гезикли мажлис болду.

 

Ачыкълашдырып айтгъанда, оьтгерилген шо гьаракатда белгили дин алимлер, олай да эл арада, халкъ арада атлары айтылгъан адамлардан  къайры да, гьакимлик къурумларыны жаваплы къуллукъчулары да ортакъчылыкъ этди. Инг алда юрт мадрасагъа юрюйген гьапислер сагьнагъа ерлешдирген къолъязмалы Сыйлы Къуранны жыйылгъанлар абур этип эретуруп  къаршылады.

Паравулну имамыны къуллугъун кютеген Абдулла-гьажи Абдуллаев шо гюн юртгъа гелгенлени къаршылап мажлисни ачылгъаны гьакъда билдирди.

Шондан сонг, Къарабудагъгент районну  гьакимбашыны заместители Жалалутдин Жамалутдиновгъа сёз берилди. Ол Сулеймен-гьажи Аширлаевге ислам  динге къуллукъ этивню ёлуна тюшюп юрютеген гьаракатына, айрыча Сыйлы Къуранны  арив хат булан гёчюрюп язгъангъа  разилигин билдирди. Шону булан бирге, Къарабудагъгент районну гьакимбашы Магьмут Амиралиевни къутлав кагъызын малим этди. Шондан къайры да, огъар Паравулдагъы школаланы бирисинде охувчу яшланы арапча арив хат булан язывгъа  уьйретеген  дарсланы  юрютмеге имканлыкъ берилежеги гьакъда да  айтды.

Оьтгерилген мажлисни барышында белгили болгъаны йимик, Сулеймен-гьажи Аширлаев каллиграфиядан, арапча арив хат булан язывгъа багъыш-лангъан бютюнроссия, халкъара даражасында юрюлеген кёп санавдагъы конкурсларда ортакъчылыкъ этип гелген. Артдагъы 30 йылны узагъында ол бизин республиканы юртларында ва шагьарларында, олай да ондан тышда да 100-ден де артыкъ межитлени ва мадрасаланы ичлерин арапча язывлар булан накъышлагъан, исбарлагъан. Шолайлыкъда, ол дюнья оьлчевдеги усталаны ишлерин гёрюп, шайлы сынав топлагъан,  бажарывлугъун­ камиллешдирип артдыргъан, гьар алипни тетиксиз язмагъа уьйренген. Гьар гьарпны оьзю сюеген кюйде къабул этеген болгъанда, 150 гюнню ичинде давам этилип тургъан оьзюню аслу ишине – Сыйлы Къуранны  арив хат булан гёчюрюп язывгъа гиришген. Адамлардан, дюньялыкъ аваралардан айрылып, янгыз намазгъа ва ашамагъа чыгъып, загьмат учун онгаргъан уьюнде чалышгъан.

Мажлисде чыгъып сёйлеген дин алимлер Арсланали-гьажи-апенди Гьамзатов, Телей-гьажи Къазиханов, Магьамматгьанапи-гьажи Гьамзатов, Калимулла-гьажи Шихмуратов, Чамсутдин Арсланханов, Пахрутдин Шугьайыпов, Дагъыстанны милли масъалалагъа ва дин ишлерине къарайгъан­ министрини заместители Расул Гьажиев шо гьакъда биринден-бири алып дегенлей айтдылар. Паравулну юртбашы Иманали Изиев, юртлу тамаза Ибадулла Ибадуллаев ва кёп оьзгелери  шо гюн оьтгерилген гьаракат Сыйлы Къуранны айланасында бизин жамиятны бирлешдирмеге болушлукъ этегенин де айрыча эсгердилер. Янгыз Яратгъан Есибиз Къудратлы Аллагьгъа гьакъ юрекден къуллукъгъа белсенген муъмин адам Сулей-менгьажи Аширлаев йимик, Сыйлы Къуранны арив хат булан гёчюрюп язмагъа болагъаны гьакъын­да айтдылар. Иманали Изиевни сёзлерине гёре, Сыйлы Къуранны арив хат булан гёчюрюп язгъан Сулеймен-гьажи Аширлаев «Паравулну гьюрметли ватандашы» деген атгъа лайыкълы болгъан биргине-бир юртлу гьисаплана. Сулеймен-гьажи Аширлаевни къур­дашларыны атындан мажлисде Абубакар Магьаммаев чыгъып сёйледи. Ол оьзюню сёйлевюнде бугюнлерде иш къуллукъларына байлавлу Къырымда яшайгъанын айта туруп, къырым татарланы ва бизин уьлкеге артдагъы вакътилерде къошулгъан республикаланы халкъыны атындан паравуллулагъа салам калималарын етишдирди. Мажлисни барышында Сыйлы Къуранны ва бусурман уьмметни алгъышлайгъан нашитлер, назмулар айтылды. Жыйылгъан чакъы халкъгъа аш да берилди.

 

Насрулла БАЙБОЛАТОВ.

 

Авторизация
*
*
Регистрация
*
*
*
Согласны с условиями сайта?
Генерация пароля