Бабаюрт спортшколасында тарбияланагъан, 86 кило авурлукъда ябушагъан Хасмагьаммат Жаватханов, Самара шагьарда ябушувну бокс журасындан оьтгерилген, эки керен Олимпия оюнланы чемпиону Олег Сайитовну атындагъы Россияны Кубогуна ес болду.
Ярышлар узатылгъан 5 гюнню ичинде Россия Федерацияны гьар тюрлю регионларындан гелген спортчулар, инг де агьамиятлы тогъа-тартывларда алдынлы болуп, милли командада биринчи болмакъ учун ябушдулар. Касбучулар оланы ябушувларына тергевлю къарагъан сонг, ахыр гьасиллеге гёре, Россиядан халкъара оюнларында ортакъчылыкъ этежек 13 гючлю спортчуну атлары аян этилди.
Бабаюрт спортшколада бокс ябушувну старший тренери Марат Шихалиев тарбиялагъан Х. Жаватханов, санкт-петербурглу Андрей Косенкону 5:0 санав булан утуп, огъар бир имканлыкъ да къоймай, ярым финалгъа чыкъды.
Белгород областдан гелген Вадим Шеблыкин булан оьтгерилген финал ябушувну да Хасмагьаммат 5:0 санав булан утду, Россияны Кубогу боксёргъа гезикли савгъат болду.
«Россияны Кубогунда ортакъчылыкъ этмек Хасмагьаммат учун уллу уьстюнлюкден къайры да, башгъа халкъара турнирлерде ортакъчылыкъ этмек учун имканлыкълар тувдура. Демек, Х. Жаватханов Европа чемпионатында ортакъчылыкъ этежеклени сайламлыларыны арасында болуп токътай. Биз гьали бары гючюбюзню салып, янгы уьстюнлюклеге онгарылма герекбиз», – дей Марат Шихалиев.
Хасмагьаммат бокс ябушувдан эки керен уьлкени биринчилигин де утгъан, оьтген йылны ахырында буса яшёрюмлени арасында Будва шагьарда боксдан оьтгерилген чемпионатында гюмюш медалгъа ес болгъан.
Герейхан ГЬАЖИЕВ,
оьз мухбирибиз.
