Билимли мингни йыгъар

Биология дарсдан охувчу яшланы Бютюнроссия олимпиадасыны регион бёлюгю тамамлангъан. Магьачкъала шагьарда эки гюнню узагъында юрюлген олимпиаданы биринчи гюню ону ортакъчыларыны теория билимлерин аян этивге, экинчи гюню буса охувчулар топлагъан билимлерин яшавда къоллап бажарагъанына багъышлангъан.

 

Буйнакск райондан баргъан Эрпелидеги орта школаны 11-нчи класыны охувчу къызы Амина Ахычева район ва республика конкурсларда ортакъчылыкъ этип алдынлы ерлеге, савгъатлагъа ес болагъаны уьйренчик болуп да къалгъан. Билимли мингни йыгъар дегенлей, артдагъы эки-уьч йылны гьисапгъа алсакъ да, ол  математика, ОБЖ дарслардан юрюлген олимпиадаларда яхшы билими, англаву барын гёрсетип, шексиз кюйде алдынлы ерлени къазангъан.

Амина 7-нчи класда охуйгъан заманындан башлап биология дарсгъа да айрыча тергев ва агьамият берип янаша ва юрегине тутгъан муратларына етишме къаст этип чалыша. Муна биология дарсдан юрюлген ва ол алдынлы ерге ес болгъан гезикли олимпиаданы гьасиллери де Аминаны терен билимлери барын исбатлай. Ол башгъа тюрлю предметлени де яхшы биле ва районда юрюлеген конкурсларда, олимпиа-даларда уьстюнлюк алып юрюй.

Амина Ахычеваны  уьстюнлюгюнде, озокъда, биология дарсланы ачып-чечип англатагъан, оьз касбусун кёп сююп юрютеген муаллим Гуляймат Жабрайылованы да аслам пайы бар.

Мугькам билимлери де, яхшы англаву-тарбиясы да бар Аминагъа  ва ону муаллимине уллу уьстюнлюклеге етишмекни ёрайбыз.

 

Казим КЪАГЬРУМАН.

 

Авторизация
*
*
Регистрация
*
*
*
Согласны с условиями сайта?
Генерация пароля