Дагъыстандагъы ёлланы сан янына тергев берсенг ва башгъа ерлер булан тенглешдирсенг, артдабыз деп эсиме геле, тек оланы кёбюне ва тыгъыслыгъына къарагъанда – уьлкеде алдынлы ердебиз. Артдагъы йылларда гьал къолайлаша ва сан янлы ёлланы къурулушу чалтлаша. 2023-нчю йылда Дагъыстанда 6 кёпюр къурулгъан, 136 чакъырым ёллар къурулгъан ва генглешдирилген.
Гюнде 35 минг машин оьтеген «Кавказ» деген федерал ёлну Дагъыстандагъы мезгили 276 чакъырым бар, шо Мычыгъыш Республикадан баш ала ва Азербайжан Республиканы дазусуна етише. Шо халкъара ёл Россияны къыбла бойда ерлешген тыш пачалыкълар булан байлайгъан аслу ёл деп токъташдырылгъан.
Нечакъы къаст этилсе де, ёлларда болагъан хатабалагьланы кемитме бажарылмай тура: йылда орта гьисапда ёлларда 500 адам оьле ва 2000 яралана. Оьтген йылларда аслу гьалда тергев «Кавказ» деген федерал ёллагъа берилип ва шоланы 65 чакъырымы 4 машин юрюйген кюйде этилген.
Тезде Хасавюртну, Дербентни ва Магьачкъаланы айланып оьтеген ёллар къурулма да башланажакъ.
Алдындагъы гюнлерде Дагъыстанны Гьукуматыны Председатели Абдулмуслим Абдулмуслимов Лаваша районда болду. Шонда оьтгерилген жыйында гьисап берген Дагъыстанны транспорт ва ёл хозяйство министри Жамболат Салавов 2024-нчю йылда федерал ёлну янгыртыв давам этилежек ва тав бойлагъа барагъан ёллар да ярашдырылажакъ деди. Шо ишлер учун Дагъыстангъа 7 миллиард манат гёрсетилген. Биринчи кварталда шондан 1,4 миллиарды ишлетилинип де битген.
Шону булан бирге ёл бойдагъы имаратлар ва кёпюрлер де ярашдырылажакъ. Орта гьисапда 41,1 чакъырым ерни ва 3 кёпюрню ярашдырма гёз алгъа тутулгъан.
Министр айтагъан кюйде, гьали районланы арасындагъы ёллагъа тергев артажакъ. Бу йыл аслу гьалда Къазбек районда «Дылым — Иманалиросо» ва «Буйнакск — Къызылюрт — Дубки», Гюнбет районда «Буйнакск — Гимры — Чирката», Гергебил, Гунибский ва башгъа тав районлагъа барагъан ёллар ярашдырылажакъ.
Г. КЪОНАКЪБИЕВ.
