Совет девюрню барышында Коммунист партияны къысматына четимликлер не саялы тувулунгъаны англашыла. Пачалыкъны башын тутгъанлар булан бир болуп банк къуллукъчулар къоллавчуланы башын- гёзюн чырмап ахыр гюнюне къаравулланмагъан балагьлар учун сакълагъан къаны-жаны булан къазангъан акъча маяларын талап, халкъны онгайын бузуп байындылар. Къан да бир, мал да бир деген кюйде, байынмагъанлары да атылтылып, яллатылып ёкъланды…
Гьали де, базар аралыкълар оьмюр сюреген девюрде, пачалыкъны законларындан пайдаланып, ислам динни шариат булан байлавлу мердешлерин къолламагъа къаст этеген гюплени гьаракаты ачыкъ болуп гёрюне. Неге десегиз, гьаракатчы ва бажарывлу тайпаланы пачалыкъ да акъча маялар булан кёмеклеше туруп, якълай ва арагъа чыгъара.
Озокъда, шогъар ислам динни, банк къуллукъланы янындан да тергев арта барагъанын заман ачыкъ этип гёрсете. Гьасили, харжы бар адамланы маячылар ва пачалыкъ булан бирлешип инвестиция проектлени яшавгъа чыгъармакъ учун юрюлеген гьаркатларда ортакъчылыкъ этмеге чакъыра, харжлары булан пайчы болмагъа насигьатлар бере.
Бугюнлерде шо масъалагъа байлавлу болуп Магьачкъалада Печатны уьюнде республикабызны маълумат къуралларыны къуллукъчуларын да къуршап прес-конференция оьтгерилди. Прес-конференцияны сиптечиси болуп Дагъыстанны далапчылыкъ ва инвестиция агентлигини къуллукъчулары арагъа салынгъан масъалагъа байлавлу болуп баянлыкъ берди.
Прес-конференцияда эсгерилген къурумну башчысы Гьусейн Гьусейнов бизге белгисиз себеплеге гёре ортакъчылыкъ этмеди.
– Бизин республикабызда гьалиги заманда увакъ ва орта далапчылыкъны толу кюйде ачыкъгъа чыгъармакъ учун пачалыкъны янындан гьар тюрлю кёмеклешив чаралары гёрюлегени гьакъда айрыча эсгерме тюше, – деди ДР-ни далапчыларыны ихтиярларын якълав булан машгъул болагъан ишчи группасыны башчысы Магьаммат Юнусов. – Шону булан янаша бизин уьлкебизде биринчилей болуп Башкъырт ва Татарстан Республикаларда банк къуллукъланы пайдаландырывда исламда токъ-ташдырылгъан асувлу къайдаларын къолламагъа башлады.
Гьали буса сынав гьисапда шону бизин республикабызда да пайдаландырмакъ учун эки йылгъа гёз алгъа тутулгъан заманлыкъ чаралар оьтгериле. Шону аслу мурады – ватандашланы харжларын къоллав булан дазуланмайлы, ислам пачалыкъланы маячыларыны харжларын да Дагъыстанны гележекдеги онгайы, экономикасыны ва халкъны яшавуну оьсювю учун пайдаландырыв болуп токътай.
Уьстде де эсгерилгени йимик, бизин республикабызда шо сынав оьтген йылдан тутуп оьтгерилмеге башлагъан. Тек гьалиге ерли шонда ортакъчылыкъ этеген пайчыланы санаву 1 процентге де етишмеген. Муна шо саялы да къоллавчуланы ихтиярларын якълап бир башлап пайчыланы башын-гёзюн чырмап алдатып байынма къаст этип айланагъан къурулуш компанияланы ва шолай да банкланы алдатыв булан машгъул башчыларын толу кюйде ачыкъгъа чыгъарма герек. Сонг да, шону булан дазуланмай, айыплыланы къатты кюйде жавапгъа тартмагъа герек бола. Ёгъесе, агьамиятлы инвестиция проектлеге, башалман кюйде юрюлеген къурулушлагъа къошулма муштарлыланы инандырма гележекде къыйын болажакъ.
Къ. КЪАРАЕВ.
