Уруну арты къуру, саякълар да къачан буса да ялкъып уялып токътай. Тек авлиягъа амал ёкъ деп негьакъ айтылмай.
Магьачкъаланы Редуктор посёлогуну Каспий ягъа боюнда айлана ягъыбыздагъы артып тербейген ич ва тыш талапланы гьисапгъа алып, ял алмагъа гелеген шагьарлыланы, къонакъланы, туристлени хошландырмакъ учун онгайлы шартлар яратылгъаны ачыкъ болуп гёрюне…
Гюн тюшюрмеге, ойнамагъа, киринмеге сюегенлер учун денгиз бойда, пляжда ерлешдирилген гьар тюрлю ясандырывлар, спорт алатлар-майданчалар, гётермелер, къурулушлар актив кюйде ял алмагъа имканлыкъ берегени, озокъда, разиликни тувдура.
Этилинген ишлеге бугюнлерде шагьар администрацияны янындан ва къоллавчуланы ихтиярларын якълайгъан къурумларыны вакиллеринден къурулгъан тергев комиссиясыны ортакъчылары да разилигин билдирди. Шондан сонг оьтгерилген ишлени сан янын да гьисапгъа алып, ял алыв ерлер пайдаландырывгъа берилди.
Шо гюн-бугюн арадан онча кёп заман да оьтмеген. Тек не этерсен, шогъар да къарамайлы, ял алыв бойда яратылынгъан онгайлыкълагъа, спорт алатлагъа элбезген хасмуш тайпаланы янындан ачыкъдан-ачыкъ зарал этилинегени ичингбушдура. Олар спорт алатлагъа ва ярыкъ береген алаша багъаналагъа зарал гелтирген. Авлиялагъа къаршы не амал этмеге герек деген сорав тувулунагъаны англашыла.
Биз ойлашагъан кюйде, узакъгъа тартып турмайлы, янгы къурулуп пайдаландырывгъа берилген ял алыв ерлени есилерин токъташдырып, ер-еринде белгилеп видеотергевлени салмаса, гележекде де заралны уьстюне зарал къошулажагъы шекликни тувдурмай.
Къ. КЪАРАЕВ.
Автор чыгъаргъан сурат.
