Хас асгер гьаракатда ортакъчылыкъ этеген бизин къоччакъ уланланы гьакъында нечакъы язсакъ да кёплюк этмежек деп эсибизге геле. Неге десегиз, олар Ватанны, халкъыны аманлыгъын, къоркъунчсуз парахат турушун якълай ва гёрсетген къоччакълыгъы учун тийишли савгъатлагъа ес де болуп туралар. Муна шолай, оьтген гюнлерде Дагъыстанны Гьукуматыны ёлбашчысы Абдулмуслим Абдулмуслимов, хас асгер гьаракатны ортакъчысы бабаюртлу Расул Зубаковгъа, оьсюп гелеген яш наслуну тарбиялавда этеген къыйматлы къошуму учун Аметхан Солтанны медалын тапшургъан.
Алда да эсгерип гетгеник йимик, Расул — мекенли асгерчи. Ол башлап Абхаз Республикасында парахатлыкъны якълавчуларыны, сонг буса Армения респуб—ликасында парахатлыкъ болдурагъан асгер бёлюклеринде къуллукъ этген. Абхаз республиканы пачалыкъ савгъаты булан да савгъатлангъан.
Хас асгер гьаракат башлангъанлы, биринчи гюнлерден тутуп, Расул, тюзлюкню яны болуп, гележек уьстюнлюкге инанып, Донбасны халкъын миллетчилерден якълавда гьалал къуллукъ эте. Ол дав ёлдашларына ругь берип, ери гелгенде яралангъанлагъа кёмекге де етише. Асгер къуллугъун кютеген вакътиде гёрсетген къоччакълыгъы учун, Россия Федерацияны Башкомандующийи Владимир Путинни Указы булан Жуковну медалы булан да савгъатлангъан.
Хас дав гьаракатдагъы командировкасы битген сонг, районубузну игити Расул оьзю къуллукъ этеген Нагорный Карабахдагъы асгер бёлюгюне гетген.
Оьтген йылны май айында, Россияны Оборона министрини къарары булан, «Парахатлыкъны якълавдагъы гьаракатыны ортакъчысы» деген медаль ва Россияны Савутлу Гючлерини дав автомобилистлерини гюнюню 113 йыллыгъы булан байлавлу болуп, Расул Зубаков Гьюрметлев грамота булан да савгъатлангъан.
Расулну бирдагъы бир гезикли савгъаты оьзюне узакъ къарама борчлу этмеди. Парахатлыкъны якълавда гёрсетген асгер борчун оьр даражада кютегени саялы, прапорщик Р. Зубаков Нагорный Карабахда парахатлыкъны якълайгъан Россияны асгер гючлерини командующийи генерал-полковник Александр Ленцовну къарарына гёре, «Нагорный Карабахда парахатлыкъны якълавда ортакъчылыкъ этгени саялы» деген медаль булан савгъатлангъан. Ону тёшюн «Дагъыстанны халкъ игити» деген медаль да безей.
Биз къоччакъ уланларыбыз булан оьктем болабыз ва олагъа сав-саламат ожакъларына къайтмакъны ёрабыз.
Герейхан ГЬАЖИЕВ.
СУРАТДА: Расул ЗУБАКОВ.
