Газетибизни алда чыкъгъан номеринде «Мал айландырывгъа ёллар кёп» деген баш булан ДР-ни экономика ва территория оьсюв министри Гьажи Солтанов булан гьазирленген лакъырлашыву печат этилинген эди. Макъалада  айлана ягъыбыздагъы экономика къысасланы шартларында дагъыстанлыланы арасындан лап да лайыкълы далапчылары тышгъа мал йиберилеген къайдалардан нечик пайдаланагъаны гьакъда сёз юрюле эди.

 

Гертиден де, мал айландырывгъа ёллар кёп. Айтмагъа сюегенибиз, бугюнлерде бизин респуб­ликабызда экспорт булан машгъул болагъанланы бир бёлюгю Къыргъызстангъа иш сапары булан къонакълай гетген.

Шогъар байлавлу болуп ДР-ни Гьукуматыны янында иш гёреген экс­порт ишлер булан машгъул болагъанлагъа кёмек этеген центрыны башчысы Руслан Абаскъулиев респуб­ликабызны маълумат къуралларына къысгъаракъ баянлыкъ берген.

– Артдагъы йылларда бизин булан дос тюгюл пачалыкълар билдирген санкцияланы шартларында, Россияны оьзге регионларында йимик, бизин респуб­ликабызда да экономика-политика байлавлукъланы беклешдиривге байлавлу болуп янгы ёллар ахтарыла ва асувлу кюйде пайдаландырыла, –  деди Р. Абаскъулиев оьзюню бая­нында.  – Дагъыстанны Башчысы Сергей Меликовну сиптечилиги булан айлана якъдагъы къысаслагъа бойсынмайлы, тыш байлавлукъланы генглешдирив ишлер къурумлу кюйде давам этиле. Шолайлыкъда, Дагъыстандан  СНГ-ни пачалыкъларына ва арап уьлкелерине экспортгъа йиберилеген малланы ва этилинеген къуллукъланы къадары да артып тербей.

ДР-ни Башчысыны гьай этивюню натижасында  увакъ ва орта далапчылыкъ булан машгъул болагъан тайпалагъа артдагъы эки йылны ичинде пачалыкъны янындан 140 миллион манатгъа ювукъ харжлар булан кёмек этилингени гьакъда да разилик булан эсгерсек дурус болур. Бизин центрны къуллукъчулары да оьз борчларына бажарывлу кюйде янашагъанын натижаланы къолайлашагъаны ачыкъдан ташдыра.

– Бугюнлерде увакъ ва орта далапчылыкъ булан машгъул болагъан тайпаланы бир гюбю Къыргъызстан республикагъа ишчи сапары булан гетгени гьакъда белгили. Сапарны барышында не йимик борчланы яшавгъа чыгъармагъа умут этиле?

– Дагъыстанлы далапчылар Бишкекде йимик Къыргъызстанны оьзге шагьарларында да аслу гьалда  агъач малларын, техника алатларын, жынслы къой ва эчки малланы, туварны, чайларын ерли къоллавчулагъа малим этежек. Шолайлыкъда, экспорт дыгъарлар байланып дегенлей, мал айландырыв ишлени генглешдирмеге дагъы да имканлыкълар яратылынажакъ.

 

Къ. КЪАРАЕВ.