Абдурагьман МАГЬМУТОВ:
«Далапчылыкъны мекенлешдирмесек бажарылмай»
Бугюнлерде ДР-ни Гьукуматыны Председателини заместители Абдурагьман Магьмутов Россияны налог управлениесини Дагъыстанда иш гёреген бёлюгюнде ишчи ёлугъувда ортакъчылыкъ этген. Ёлугъувну вакътисинде республикабызны темиркъазыкъ боюнда бюджетни толумлашдырыв булан машгъул болагъан ишчи группасыны чалышывуну гьасиллерине къаралгъан.
Бюджетге гелеген налог къошумлар, экономиканы яшыртгъын тармагъын ачыкъгъа чыгъарыв булан тувра байлавлугъу гьакъда ёлугъувда генг кюйде гьакълашыв болгъан.
– Озокъда, ишчи группаланы ортакъчылары бюджетни къошум налог гьакълар булан толумлашдырывда борчларына жаваплы кюйде янашагъаны разиликни тувдура, – деген Абдурагьман Магьмутов, арагъа салынгъан масъалаланы жамын чыгъара туруп. – Йылдан-йылгъа налог къурумларда коммерция ишлер булан машгъул болагъанланы ва далапчы гюплени санаву артып турагъаны аян болду. Тек оланы аянлашдырыв булан машгъул болув булан дазуланмагъа тюшмей. Айтмагъа сюегеним, коммерция къурумланы ва айрыча далапчыланы чалышывун законлашдырмай туруп, гьисапгъа алыв бизин ишибизге къыйышмай, алгъа салынагъан талаплагъа жавап бермей. Экономиканы гьар-бир тармагъында ачыкълыкъ булан иш гёрсетмеге таклиф этилине.
Арагъа салынгъан аслу масъаланы гьакъында айта туруп, ДР-ни налог къуллугъуну башчысы Айдар Байрамов да оьзюню гьисап беривюнде бизин республикабызны ва шолай да муниципал къурулувларыны налог къурумларыны алдына салынгъан планланы ва борчланы гьакъында толу кюйде баянлыкъ берди.
– Гьар тюрлю оьлчевдеги бюджетлеге тюшеген планлашдырылгъан гелимлени толу кюйде жыймакъ учун районланы ва шагьарланы башчылары булан байлавлукъда налог базагъа гийирмеге герекли объектлени гьисапгъа алма гьажатлы, – деген Айдар Байрамов. – Неге десегиз, топуракъгъа ва мал-матагьгъа салынагъан налоглар йимик далапчылыкъ тармакъда да бугюнге ерли тапшурувлар толу кюйде яшавгъа чыгъарылмагъа тарыкъ.
Жыйынны ахырында республикабызны башгъа-башгъа бойларында иш гёреген ишчи группаланы ортакъчыларына да айрыча тапшурувлар берилди.
Къ. КЪАРАЕВ.
СУРАТДА: ёлугъувну ортакъчылары.
