Россияны Оьр суду Магьачкъаладагъы аэропортда болгъан къалмагъалларда ортакъчылыкъ этгенлени уголовный ишлерине Краснодар крайны Армавир шагьар судунда къаралажакъ деп токъташгъан. Сайки, Къарабудагъгент район судда (Уйташ аэропорт Къарабудагъгент районда ерлешген) жавапгъа тартылагъанлагъа къаршы тюз ва адилли тёре гесилмежек, олар оьзлени аманлыкъны къоруй­гъан къурумлардагъы танышлары булан пайдаланажакъ.

Гетген йылны октябр айыны 29-нда  бир мингден артыкъ жагьил адамлар Интернетдеги ялгъан билдиривлени таъсирине тюшюп, Магьачкъалагъа Тель-Авивден учуп гелеген самолётда  Исрайылны ватандашларын къаршылама чыгъа. Къазаплангъан бир табун халкъ аэропортну тыш пачалыкълардан учуп гелеген самолётланы къабул этеген бинасыны эшиклерин бузуп ичине гирген, дазучуланы ишине пуршавлукъ этген. Бир пайы самолёт къонагъан майданчагъа чыкъгъан. Олагъа къаршылыкъ билдирме къарагъан  полицейскийлени токътатма къарагъан.

Гечге таба республиканы Ич ишлер минис­терлигини маълумат бёлюгю билдирген кюйде, къалмагъалларда ортакъчылыкъ этгенлени 240-ву судну къарары булан къодулар тёлеп къутулгъан.

Гьали Армавир судну алдында 22 йыллыкъ таргъулу Анварбек Атаевге, ондан эки йылгъа гиччи Магьачкъалада турагъан Ислам Ибрагьимовгъа ва Магьаммат Омарасгьабовгъа,  19 йыллыкъ каспийскили Рабадан Ражаповгъа, Агъул райондан 26 йыллыкъ Салик Рамазановгъа токътамагъа ва жавап бермеге тюшежек. Суд оланы 8 йылгъа ерли эркинликден магьрюм этмеге бола.

 

Алав АЛИЕВ.