Къоччакълыкъны ёлунда

Савлай уьлкебизде йимик, Бабаюрт районну эревюллю уланлары Ватан алдына салгъан борчланы къоччакъ кюйде кюте геле десек, къопдурув болмас. Муна бугюнлерде оланы ишлери гьакъында районгъа гелген бирдагъы бир шат хабар да бизин сююндюрмей болмай.

 

Бабаюртлу, Россия Федерацияны дазу сакълав асгерини сапёр батальонуну младший сержанты Оразали Гьашымов, Украина бойдагъы хас асгер гьаракатда ортакъчылыкъ этип, гёрсетген игитлиги учун «Къоччакълыгъы учун» деген медаль булан савгъатлангъан.

Хас асгер гьаракат башлангъанлы Оразали гёнгюллю кюйде элин якъламагъа гетип, алдынлы асгерлени сыдраларына тюшген. Ол дав тапшурувланы бажарывлу кюйде яшавгъа чыгъарып, Донбасны халкъын миллетчилерден азат эте туруп, гьар абат булан уьстюнлюкню ва адамланы парахат яшавгъа ювукълашдырмагъа къаст этген.

Гетген йыл Россияны дазу сакълав асгери къурулгъанлы 105 йыл битгенликге байлавлу болуп, Оразали Гьашымов «Дазу сакълав асгерини 105 йыллыгъына» ва «Дазу сакълавчуланы бирлиги» деген медаллар булан да савгъатлангъан.

«Мен мунда савгъат учун гелмегенмен. Бизин барыбыз да учун уллу савгъат – уьстюнлюк», – дей дагъыстанлы къоччакъ улан Оразали Гьашымов.

Алда да эсгерилгени йимик, Ватаныбызны якълавда хас асгер гьаракатда Бабаюрт райондан юзлер булангъы уланлар ортакъчылыкъ эте. Оланы кёплери орденлер, медаллар булан савгъатлангъан. Амма эсен-аман уьйлерине уьстюнлюкню алып къайтса, шо бары да савгъатлардан сыйлысы болуп токътажагъы аян.

 

Герейхан ГЬАЖИЕВ,

оьз мухбирибиз.

 

Авторизация
*
*
Регистрация
*
*
*
Согласны с условиями сайта?
Генерация пароля