Айрокъда артдагъы 2-3 йылланы ичинде «Земский доктор/фельдшер» деген савлукъ сакълавну федерал программасына айрыча тергев берегенин гьис этебиз. Неге тюгюл, гертиден де кёбюсю юртлагъа тарыкълы медицина касбучулар етишмей. Шо саялы да бугюнлеге ерли бу программаны ортакъчыларыны чагъына да агьамият бермейлер. Оланы алдына биргине-бир талап салына. Айтагъаным, олар санав якъдан 50 мингден кем адам яшайгъан юрт ерлерде иштагьлы кюйде гьаракат этмеге герек.
Бу программагъа гёре ишлеге къуршалгъан врачлагъа бир керен 1 миллион, барма къыйынлы ерлерде ишлейгенлеге буса 1, 5 миллион манат бериле. Фельдшерлеге байлавлу да шолай. Олагъа да бир тирет 500 минг, четимликлер тувулунагъан ерлердегилерине буса 750 минг акъча гёрсетиле.
Шондан къайры, медицина къуллукъчулар загьмат тёгеген ердеги муниципа-литетлер олагъа яшав масъалаларына да кёмек эте.
«Земский доктор/фельдшер» бир керен тийишли харжын алгъан сонг, 2-нчи гезик олагъа башгъа ерге барып, дагъы да акъчалар алмагъа бажарылмай.
Бу йыл умуми алгъанда, «Земский доктор/фельдшер» программа булан Дагъыстанны юрт ерлеринде 170 медицина къуллукъчу касбусуна гёре ишлеге гиришип, чалышажакълар. Гьасили, республиканы юртлары 149 врач ва 21 орта медицина къуллукъчу булан таъмин этилинежек.
Гертиси, 11 йылны ичинде ерлердеги савлукъ сакълавну яхшылашдырывуну натижасында юртларда 2 мингден де артыкъ касбучу халкъгъа медицина кёмек этип тура.
Паху ГЬАЙБУЛЛАЕВА.
