Апрель айны 16-нда ич ишлени Магьачкъала шагьар бёлюгюне ерли къатынгишиден арза гелген. Арзасында ол белгисиз адам тюкенинден сахават акъчалар жыйылагъан къутукъну урлагъан деп билдирген. Уручу тутулгъан. Огъар къутукъда болгъан 25 минг манатны къайтарма тюшген. Тек шону булан къутулмажакъ ва закон булан жавапгъа тартылажакъ
* * *
Апрель айны 15-нде Ботлих районну Тандо юртунда жагьил адам бир замангъы къурдашына, ичинде «савгъаты» булангъы къутукъну бакъдыргъан болгъан. Юртлусу къутукъну ачгъанда, ичиндеги атылтыв алат атылгъан, ол яраланып азарханагъа тюшген.
* * *
Апрель айны 14-нде Унцукул районну Иргъанай юртунда жагьил адам тезги танышын бичакъ уруп оьлтюрген ва юртну къырыйындагъы «Мачам» деген ерде гёмген. Жинаятчы тутулгъан.
* * *
Апрель айны 15-нде полицейскийлер Магьачкъалада 55 йыллыкъ ерли адамны токътатып сумкасын тергегенде, ичинде 120 грам наркотиклер табулгъан. РФ-ни Уголовный кодексине гёре ону 20 йылгъа ерли эркинликден магьрюм этмеге болалар.
* * *
Апрель айны 15-нде Хасавюртда Тажикистанны 21 йыллыкъ ватандашы къуш фабрикни директоруну кабинетине гирип тюбек булан атышып ёлбашчыны яралагъан. Ахтарывлар башлангъан.
* * *
Бу йылны уьч айыны ичинде Дагъыстанда 614 от тюшюв болгъан. Шоларда 321 адам зараллангъан, 45 адам оьлген.
Алав АЛИЕВ.
