13 йыл алъякъда, ачыкъ этип айтгъанда, 2011-нчи йылны июн айыны 7-нде ахшам вакъти Магьачкъалада Абубакаровну атындагъы орамда ерлешген кёп къабатлы уьйлени алдында Темиркъазыкъ Кавказда биргине бир дин ва халкъара аралыкъланы институтуну ректору, философия илмуланы доктору Макъсут Садыкъов ва ону къызардашыны уланы Залимхан Мусаев оьлтюрюлген эди. Жинаятчылар алимге ва ону къардашына автоматлар булан 30 керен атышгъан.
Дагъыстан Совет Союз тозулгъан сонггъу тарихинде не вагьшиликни де, не зулмуну да гёрген, тек дин арада абуру бар белгили адамны оьлтюрювю жамаатны арасында айрокъда уллу къазапланывну тувдургъан, къувунлу сеси тез Москвагъа ерли етишген. Жинаятчылыкъны уьстюн ачмакъны Россияны Ахтарыв комитетини Дагъыстан управлениесини айрыча агьамиятлы ишлени юрютеген уьчюнчю бёлюгюне тапшуралар. Тек бирев де шогъар мекенли урунмагъа къарамагъан, уголовный иш булангъы папка 10 йыл управлениени тахчаларында чанг басып ятып тургъан.
2022-нчи йылны август айында Ахтарыв комитетни председатели А.Бастрыкинни тапшурувуна гёре, ахтарывлар янгыдан башлангъан ва узакъ къалмай ректоргъа чапгъын этгенлени бириси, онгача къорув къурумну къуллукъчусу туршунайлы (Бабаюрт район) Рамазан Магьамматов тутулгъан. Муна шо заман Пачалыкъ Думаны депутаты Магьаммат Гьажиевни аты арагъа чыкъгъан ва ол халкъара ахтарывлагъа берилген. Аманлыкъны къоруйгъан къурумлар токъташдырагъан кюйде, М.Гьажиевни институтну башчысы булан тезден берли аралыкълары яхшы болмагъан, оланы тухум-тайпасы бир райондан чыкъгъанлар ва бир-бири булангъы эришивлери кёп тарихи теренлеге гете. М.Гьажиев йыл сайын эл арада абуру арта барагъан М.Садыкъовну оьлтюрме токъташгъан ва гьакъ берип эки жинаятчыны тутгъан. Оланы бириси Р.Магьамматовну ишине гьали Дагъыстанны Оьр судунда къаралып тура.
Ондан къайры, ахтарывчуланы М. Гьажиевни иниси, Магьачкъала портну алдагъы директору Агьмат Гьажиевге де хыйлы соравлары бар. А. Гьажиев 2017-нчи йылда отпускагъа чыгъып, дагъы ишине къайтмагъан. Бугюнлерде агъа-ини Россиядан къачып, оьзлени Франциядагъы уьйлеринде яшайлар. Магьаммат Гьажиев тыш пачалыкъны хас къурумлары булан аралыкъ юрютмеге ва Пачалыкъ Думагъа байлавлу бир тюрлю маълуматлар бермеге разилешген, Украинадагъы гьакимиятны ачыкъдан якълагъан.
М.Гьажиев «Единая Россия» деген партияны сыдраларындан къувалангъанда, Дагъыстанны Башчысы Сергей Меликов шогъар сесленип, оьзюню Телеграм-каналында: «Ватанына хыянатчы болуп чыкъмакъ учун, инсанны нече де нас, къара юреги болмагъа герек. Ол европалы паспорт саялы дагъыстанлыланы, къурдашларыны, республиканы, уьлкени уьстюнден къайдагъы ялаябувланы яйып юрюй. Кукай», – деп язгъан
Гертиден де, тарихлеге гёз къаратсакъ хыянатчыланы къысматы тюзелген гезиклени мен кёп сийрек билемен. Тюзюн айтгъанда, Гьажиевлер де Ватанындан айырылып, ят эллерде сююнч алып, эркин яшажагъына инанмайман. Ахырынчы ёлуна да оланы ким узатажакъ?
Бизин маълумат: Магьаммат Гьажиев — 1965-нчи йылда Магьачкъалада тувгъан. Аскердеги къуллугъундан сонг, «Дагвино» бирлешивню гьар тюрлю жаваплы къуллукъларында ишлеген. 1998-нчи йыл оьр билим алгъанда Балыкъ байлыкъланы къоруйгъан Гюнбатыш- Каспий управлениени башчысыны заместители болуп белгиленген.
2001-нчи йылда ону налог инспекциягъа ишге чакъыралар ва РФ-ни налог къуллугъуну министерлигини Дагъыстан управлениесини начальнигини заместители этип токъташдыралар. 2003-нчю йылда Пачалыкъ Думаны депутаты этилип сайлангъан ва 2023-нчю йылда Россиядан къачгъанча, айырылмай шо борчну кютюп тургъан. Туснакъларда болгъанланы арасында «Фикса» деген аты булан танывлу.
Алав Алиев.
